Ministri i Punëve të Jashtme të Bosnjë dhe Hercegovinës (BeH) Elmedin Konakoviç shkaktoi reagime të shumta me deklaratën e tij të fundit për “Ballkanin e Hapur”, i cili edhe një herë vuri në pikëpyetje anëtarësimin e mundshëm të Bosnjes në këtë komunitet.
Duke folur pardje për njëqind ditët e para si ministër i Jashtëm, Konakoviç iu referua edhe “Ballkanit të Hapur”, i cili përbëhet nga Serbia, Maqedonia e Veriut dhe Shqipëria.
“Historia e ‘Ballkanit të Hapur’ si një lloj ‘bote serbe’ është një lloj intrige politike, pra një ‘botë serbe’ – të gjithë serbët në një shtet. Sa muslimanë dhe boshnjakë kemi ne në atë shtet potencial pa kufij, bashkëpunim rajonal, a ka llogaritur dikush? A e dini sa janë – më shumë se pesë milionë”, theksoi ai.
Përfaqësuesi i partisë opozitare DF në Parlamentin e Federatës së BeH (FBiH), Dennis Gratz, është ndër ata që e dënuan Konakoviçin për këtë deklaratë dhe e akuzuan si sipërfaqësor në këtë çështje.
Një pjesë e publikut në BeH është kundër “Ballkanit të Hapur”, duke e konsideruar atë si një mjet për Serbinë dhe Shqipërinë për të dominuar këtë pjesë të Evropës.
Për partitë serbe nga Republika Srpska (RS), BeH duhet të jetë pjesë e “Ballkanit të Hapur”, duke pretenduar se nuk është një projekt i madh shtetëror dhe se vendi do të përfitojë ekonomikisht.
“Ballkani i Hapur”, ku as Mali i Zi dhe as Kosova nuk bëjnë pjesë, përmendet gjithashtu si një projekt i mbështetur nga Shtetet e Bashkuara (SHBA). Gabriel Escobar, i dërguari special i SHBA-së për Ballkanin Perëndimor, tha vitin e kaluar se vendi i tij mbështet “Ballkanin e Hapur” si një nismë ekonomike.
Por Konakoviç, pas një takimi me ministrin e Jashtëm hungarez Peter Szijjarto në mars të këtij viti, tha se nuk do të ketë fare diskutim për “Ballkanin e Hapur” derisa të ratifikohet Procesi i Berlinit, – citon DITA, një raportim të Klix.ba
j.l./ dita
