Shqipëria do angazhohet fillimisht me oficerë shtabi në misionin ndërkombëtar stabilizues në Gaza. Lajmi u bë i ditur nga ministri i Mbrojtjes, Ermal Nufi, në një intervistë për Euronews Albania.
Nufi tha se pas përfundimit të misionit të rikonjicionit dhe analizës së raportit të hartuar nga oficerët shqiptarë, Shtabi i Përgjithshëm ka vendosur nivelin fillestar të angazhimit të Forcave të Armatosura shqiptare në këtë mision.
Sipas ministrit, faza e parë do të konsistojë në dërgimin e oficerëve të shtabit, të cilët do të integrohen në strukturën komanduese të forcës ndërkombëtare në Gaza. Më pas, në varësi të zhvillimeve në terren dhe vlerësimeve operative, do të vendoset edhe për dërgimin e trupave të tjera.
“Do të dërgojmë oficerë shtabi që të bëhen pjesë e forcës ndërkombëtare stabilizuese në Gaza. Pas vlerësimit të situatës dhe nevojave në terren, do të vijojmë me fazën e dytë për të përcaktuar konkretisht trupat që mund të angazhohen në mision”, u shpreh Nufi.
Ministri bëri të ditur se vendimi do t’i paraqitet për miratim Këshillit të Ministrave përmes akteve nënligjore përkatëse.
Ai theksoi se angazhimi i Shqipërisë është në përputhje me qëndrimin e deklaruar më herët nga kryeministri për pjesëmarrjen në nismat ndërkombëtare të paqes dhe stabilitetit.
Nufi shtoi se numri i oficerëve që do të dërgohen dhe hapat e mëtejshëm të misionit do të bëhen publikë pas miratimit të vendimit nga Këshilli i Ministrave.
“Gjithçka do të koordinohet me strukturat komanduese të forcës ndërkombëtare. Pas miratimit të vendimit të Këshillit të Ministrave do të bëjmë publike edhe numrin e oficerëve të shtabit që do të nisen fillimisht, si dhe fazat e tjera të angazhimit”, deklaroi ministri i Mbrojtjes.
j.l./ dita
