Agjencia rikonfirmon vlerësimin për Shqipërinë, parashikon se borxhi publik do të ulet në 62.3%, në 2024
Agjencia Ndërkombëtare e Vlerësimit Moody’s rikonfirmon vlerësimin aktual të Shqipërisë, “B1 – me perspektivë të qëndrueshme”, në rishikimin e saj të fundit.
Sipas njoftimit të Ministrisë së Financave dhe Ekonomisë, Agjencia vlerëson se stabiliteti makroekonomik u ruajt gjatë tre goditjeve të mëdha që pësoi ekonomia shqiptare në vitet e fundit, tërmeti në fund të vitit 2019, pandemia që e shtyu ekonominë shqiptare në recesion në vitin 2020 dhe kriza evropiane energjetike që filloi në vitin 2022, e shkaktuar nga lufta në Ukrainë.
Agjencia vlerëson se ekonomia e Shqipërisë tregoi rezistencë ndaj goditjeve me të cilat u përball, duke u rikuperuar fuqishëm në 8.9% në 2021 dhe 4.9% në 2022, pas një tkurrjeje ekonomike prej 3.3% në vitin 2020, ku sektori i turizmit u ndikua nga pandemia. Agjencia shprehet optimiste për rritjen ekonomike për këtë vit, pasi sektori i turizmit ka tejkaluar nivelin e tij para pandemisë në vitin 2022 dhe do të arrijë një kulm të ri në vitin 2023.
Edhe pse treguesit fiskalë kanë qenë në një trend pozitiv pas përkeqësimit të ndjeshëm në vitin 2013, tre goditjet e mëdha me të cilat u përball ekonomia shqiptare kanë rënduar mbi financat publike duke sjell dhe përkeqësim të borxhit publik.
Ndërsa borxhi publik total ndaj PBB-së (përfshirë garancitë) u rrit me pothuajse 9 %, duke kulmuar në 74.5% në vitin 2021, në vitin 2022, raporti i borxhit publik rihyri në një trend të fortë zbritës dhe u zvogëlua me pothuajse 10 pikë përqindjeje. Agjencia Moody’s parashikon rënie të raportit të borxhit publik në 62.3% të PBB-së në vitin 2024.
Disa javë më parë edhe Agjencia ndërkombëtare e vlerësimit Standard & Poor’s (S&P) rishikoi me rritje perspektivën e saj për Shqipërinë nga “perspektivë e qëndrueshme”, në “perspektivë pozitive”, por edhe FMN dhe Banka Botërore kanë vlerësuar me rritje 3.6% ekonominë shqiptare. Ndikues kryesor në këtë rritje janë sektori i turizmit dhe i ndërtimi.
RRITJA EKONOMIKE
Viti 2020 3.3%
Viti 2021 8.9%
Viti 2022 4.9%
MOODY’S PER BORXHIN PUBLIK
Viti 2019 65.8 %
Viti 2021 74.5 %
Viti 2022 64.5 %
Viti 2024 62.3 %
