Stuhi dhe reshje shiu kanë përfshirë vijën bregdetare të vendit.
Qyteti bregdetar i Vlorës u përfshi nga stuhia paraditen e sotme duke krijuar trafik në rrugë.
Stuhi dhe reshje shiu kanë detyruar pushuesit të boshatisin edhe plazhin e Shëngjinit këtë fundjavë.
Ndërkohë Policia Kufitare e Vlorës ka apeluar pushuesit që të shmangin lundrimet ditën e sotme. Kjo thirrje vjen nisur nga situata meteorologjike që parashikohet ditën e sotme, ku pritet një përkeqësim i motit dhe rritje e dallgëve në det, duke rrezikuar jetën e pushuesve.
“Për pushuesit që duan të lundrojnë përgjatë ditës së sotme, me mjete lundruese turistike apo argëtuese, t’i shmangin këto aktivitete pasi deti ka dallgë me përmasa të mëdha që mund të rrezikojnë seriozisht jetën e tyre”, njoftoi policia.
Gjithashtu, Policia Kufitare apelon për të gjithë operatorët turistikë që përdorin mjete lundruese, të shmangin daljen në det përgjatë ditës së sotme, pasi situata meteorologjike është e pafavorshme dhe mund të rrezikojë jetën e drejtuesve të mjeteve lundruese dhe të shtetasve në bordet e mjeteve, si dhe fundosjen e këtyre mjeteve.
Policia Kufitare e Vlorës dhe Njësia Policore Detare, përgjatë ditës së sotme, kanë kaluar në gatishmëri të plotë dhe do të jenë prezente me shërbime nga toka dhe deti, në funksion të rritjes së sigurisë së pushuesve.
Shiu vjen pas temperaturave ekstrem të valës afrikane që përjetoi vendi ynë. Reshjet priten të kalojnë shpejt ndërsa rikthehet dielli me temperaturat e verës.
