Gjykata e Lartë e Firences në Itali, ka dënuar me 30 vite burg shqiptaren Elona Kalesha, e cila akuzohet për masakrimin e prindërve të ish-të dashurit të saj. Shpëtim dhe Teuta Pasho u zhdukën në tetor 2015 dhe trupat e tyre të copëtuar, u gjetën në dhjetor 2020 në valixhe.
Elona dyshohet se futi bashkëshortët në kurth, të cilët erdhën në Itali për të parë djalin e tyre Taulantin. Ajo po priste një fëmijë nga një burrë tjetër dhe për këtë arsye, vrau dy prindërit e të fejuarit të saj, në një përpjekje që mos t’i thoshin djalit të tyre,
Taulant Pashos, i fejuar në atë kohë me Elona Kaleshën, se fëmija nuk ishte i tiji. Gjithashtu edhe u grabiti një shumë prej të paktën 50 mijë euro, që Shpëtimi kishte fituar nga një gjyq për aksidentim në punë.
Tre valixhe e më pas një e katërt, u gjetën në dhjetorin e vitit 2020 në Firenze. Brenda tyre, mbetje mortore të dy individëve, një burri dhe një gruaje. Pas hetimeve policore, u zbulua se ato mbetje, i përkisnin një çifti shqiptarësh, të cilët u identifikuan më pas si Shpëtim dhe Teuta Pasho.
Dyshime filluan të hidheshin mbi një krim me sfond mafioz, për shkak të të shkuarës të djalit të tyre, Taulant Pashos. Ky i fundit, më vonë, u zbulua se ishte i burgosur në Zvicër. Ndërsa dyshime të forta binin edhe mbi të, ngjarja mori një rrjedhë përtej të imagjinueshmes.
Ish e fejuara e Taulantit, Elona Kalesha, u përball me prokuroren e çështjes, Ornella Galeotti. Pas një zbërthimi të dinamikave disa mujore, u zbulua se krimin, në detaj, e kishte organizuar dhe kryer Kalesha. Kjo, në bashkëpunim me të tjerë.
