Nënkryetarja e PDK-së, Vlora Çitaku, e ka quajtur fëmijërore dhe të papërgjegjshme sjelljen e kryeministrit Albin Kurti, i cili ka thënë se nuk mund të marrë pjesë në takimin joformal në Tiranë me liderët e Ballkanit, për shkak të pjesëmarrjes së tij në një konferencë në Greqi.
Çitaku ka ironizuar duke pyetur se si qenka më me rëndësi “konferenca në ishujt e bukur të Greqisë sesa takimi me liderët e rajonit në Tiranë.”
“Fëmijërore dhe politikisht e papërgjegjshme sjellja e kryeministrit Kurti. Si qenka më me rëndësi një konferencë në ishujt e bukur të Greqisë sesa takimi me liderët e rajonit dhe Komisionin Evropian në Tiranë?! Kryeministër, Edi Rama nuk të ka ftuar në dasmë familjare, por në takim me liderët e rajonit, në kuadër të Procesit të Berlinit”, shkroi Çitaku.
Ajo shtoi se në takime të tilla nuk duhet të ketë asgjë personale.
“Në takime të tilla mospjesëmarrja juaj nuk është më refuzim personal i juaji karshi Ramës. Nuk ka asgjë personale këtu. Mosdurimi dhe qasja e juaj idhnake karshi kryeministrit shqiptar po e dëmton Kosovën”, tha Çitaku.