TRAGJIKE: Humb jetën pasi rrëzohet nga 10 metra lartësi

Arben Tafaj, ish-kandidati i pavarur për Bashkinë Tiranë, ka ndërruar jetë pasi është rrëzuar nga 10 metra lartësi.

Ngjarja e rëndë ka ndodhur rreth orës 00:40, në banesën e Tafajt në Rrugën e Dajtit.

63-vjeçari, nga plagët e marra nga rënia nuk ka mundur të mbijetojë.

Njoftimi i Policisë:

“Më datë 03.12.2024, rreth orës 00:40, në Rrugën e Dajtit, dyshohet se, aksidentalisht është rrëzuar nga një lartësi rreth 10 metra, në banesën e tij, shtetasi A. T., 63 vjeç. Si pasojë e dëmtimeve të marra ky shtetas ka ndërruar jetë në spital”.

Tafaj së bashku me disa miq të tij, drejtonte shoqatën “Tirana”, një grupim civil për promovimin e vlerave dhe trashëgimisë së Tiranës.

Kryetari i Bashkisë së Tiranës, Erion Veliaj, ka shprehur ngushëllimet për ndarjen e parakohshme nga jeta të anëtarit të Këshillit Bashkiak të Tiranës, Arben Tafaj, kryetar i shoqatës “Tirana”.

Përmes një postimi në rrjete sociale, Veliaj thekson se Tafaj ishte një nga zërat më të zëshëm për komunitetin, me zemër të madhe e mik i vyer për shumë njerëz që e njohën.

“I hidhëruar për lajmin e ndarjes nga jeta të anëtarit të Këshillit Bashkiak të Tiranës, Arben Tafaj, kryetar i shoqatës “Tirana” dhe një nga zërat më të zëshëm për komunitetin tonë, me zemër të madhe e mik i vyer për shumë njerëz që e njohën. 🕊️

Ikja e Arbenit është një humbje e madhe jo vetëm për familjen dhe miqtë, por për të gjithë qytetin e Tiranës. Ngushëllime të sinqerta familjes Tafaj dhe të afërmve të tij”, shkruan Veliaj.