Ka ndërruar jetë në moshën 83-vjeçare Kreshnik Tartari, një nga emrat më me ndikim dhe simbolet e padiskutueshme të volejbollit shqiptar. Për dekada me radhë, Tartari u kthye në sinonim të suksesit dhe disiplinës, fillimisht si sportist e më pas si arkitekti i periudhës së artë të Dinamos dhe kombëtares.
I lindur në korrik të vitit 1943, ai nisi rrugëtimin e tij legjendar te Dinamo e meshkujve. Më vonë, në krye të Dinamos së femrave dhe ekipit kombëtar, Tartari e ngriti volejbollin shqiptar në nivele elitare ndërkombëtare.
Karriera e tij numëron shifra rekord, mbi 400 ndeshje ndërkombëtare, 2,000 ndeshje zyrtare, 26 tituj kampionë dhe 18 Kupa Republike. Kulmi i tij historik mbetet medalja e artë në Lojërat Mesdhetare të Latakias në vitin 1987. I nderuar me dekoratën “Nderi i Kombit”, Tartari la pas një trashëgimi të pashlyeshme që e rreshton atë ndër figurat më të mëdha të historisë së sportit tonë.
j.l./ dita
