Pak ditë më parë, dikasteri i Arsimit ka miratuar edhe udhëzimin mbi kushtet e përcaktimit të frekuentimit të procesit mësimor sipas llojit të veprimtarive mësimore në programet e studimeve me karakter profesional, programet e ciklit të parë “Bachelor”, ciklit të dytë “Master”, si dhe ciklit të tretë të studimeve. Konkretisht llojet e veprimtarive mësimore që do të zhvillohen në auditore për secilin cikël do të jenë leksionet, seminaret dhe ushtrimet, punët e laboratorit, si dhe praktikat profesionale klinike dhe kërkimore-shkencore.
Për secilën prej tyre është përcaktuar edhe detyrimi i orëve që duhet të frekuentohen nga ana e studentëve. Sipas autoriteteve të Ministrisë së Arsimit dhe Sportit frekuentimi i procesit mësimor përcaktohet nga rregulloret e çdo programi studimi.
Në këto kushte për ndjekjen e leksioneve bëhet e ditur se si rregull frekuentimi i tyre është fakultativ, por vetë institucionet e arsimit të lartë mund të përcaktojnë në aktet e tyre të brendshme rregullatorë mbi frekuentimin për lëndë apo grup-lëndësh të veçanta.
Për programet e studimeve me karakter profesional, programet e ciklit të parë “Bachelor”, të ciklit të dytë “Master profesional” dhe “Master i shkencave”, apo “Master i Arteve”, si dhe programet e studimit të ciklit të tretë “Master ekzekutiv”, frekuentimi i orëve të mësimit për seminaret do të jetë i detyrueshëm në masën 75 për qind. Detyrimi në këtë masë do të jetë i vlefshëm edhe për ndjekjen e orëve të mësimit për punët e laboratorit, si dhe ato të zhvillimit të praktikave klinike.
Ndërsa për programet e studimit të ciklit të tretë që mbulojnë “Specializimet afatgjata të ciklit të tretë”, si dhe programet e “Doktoratës”, që përmbajnë si pjesë të tij lëndë të formimit teorik, ndjekja e procesit mësimor për seminaret dhe ushtrimet do të jetë e detyrueshme deri në masën 50 për qind, për orët e laboratorit deri në masën 75 për qind, si dhe për aktivitetet profesionale, klinike, apo kërkimore shkencore ndjekja e orëve të mësimit do të duhet të jetë deri në 75 për qind të totalit të miratuar.
