Një zyrtar shëndetësor po hetohet për vaksinimin e 30 nxënësve me një shiringë të vetme në shtetin qendror të Indisë, Madhya Pradesh.
Ngjarja ndodhi në një shkollë në distriktin Sagar, ku fëmijëve u jepeshin vaksinat kundër Covid-19.
Ministria e Shëndetësisë e Indisë mandatoi protokollin “një gjilpërë, një shiringë, që përdoren vetëm një herë” për vaksinat Covid-19.
India ka administruar mbi 2.03 miliardë vaksina Covid-19 deri më tani. Shiringat njëpërdorimshme përdoren gjerësisht në Indi për të shmangur përhapjen e sëmundjeve vdekjeprurëse si HIV. Megjithatë, ka pasur incidente të shumta në të kaluarën ku një shiringë e vetme është ripërdorur në spitale për shkak të mungesës së pajisjeve.
Jitendra Rai, i cili vaksinoi fëmijët tha për mediat se atij i ishte dhënë vetëm një shiringë nga departamenti i shëndetësisë dhe se thjesht po zbatonte urdhrat.
Prindërit, që po shoqëronin fëmijët e tyre në shkollë, e vunë re këtë çështje dhe e raportuan tek autoritetet e shkollës.
Kur zyrtarët shtetërorë arritën në shkollë, Rai nuk ishte aty dhe telefoni i tij rezultonte i fikur.
Ndërkohë, ka nisur hetim edhe ndaj zyrtarit përgjegjës për dërgimin e pajisjeve për vaksinimin. Një zëdhënës i partisë opozitare ka kërkuar që ministri i shëndetësisë i shtetit të japë dorëheqjen për incidentin.
India është vendi i dytë pas Kinës, që ka kaluar kufirin e dy miliardë vaksinave kundër Covid.
j.l./ dita
