Nesër hapet tuneli i Murrizit, Rama: Dibra bohet përfundimisht lagjja e gjelbër e Tironës

Nesër, pikërisht në Ditën e Verës hapet tuneli i Murrizit.

Në një postim në rrjetin e tij zyrtar në Facebook kryeministri Edi Rama shkruan se Dibra do të bëhet lagjia e gjelbër e Tiranës.

“Gati! Nesër Dita e Verës shkon edhe në Dibër dhe Dibra bohet përfundimisht lagjja e gjelbërt e Tironës”, shkruan Rama.

Më herët Rama postoi një video në rrjetet sociale, të tunelit të përfunduar, i cili prej 2019-ës ka hasur në vështirësi gjeologjike. Pamjet e tunelit të përfunduar të marra direkt nga terreni, ai nuk hezitoi t’i postojë në rrjetet sociale duke njoftuar se tuneli tashmë do të jetë i kalueshëm.

“Ky është tuneli i Murrizit, për të gjithë popullin e Dibrës që mezi e kanë pritur dhe që mendoj se e plasi syrin e keq. Syri i keq më në fund plasi, se te ai tunel na u mblodh gjithë energjia negative. Kështu që nesër tuneli i Murrizit hapet. Hapet në 14 Mars, dhe përkon me ditën e verës. Nesër nga Elbasani në Dibër”, tha Rama.

Vështirësitë gjeologjike në këtë tunel, thotë se i kishin shuar besimin. Ky tunel dhe e gjithë rruga e Arbrit është i ndërtuar me PPP, Partneritet Publik Privat.

“Ky tunel është i ndërtuar me PPP, e gjithë rruga e Arbrit. I ka dalë shtetit dhe taksapaguesve shumë më lirë se rrugët që bëheshin sidomos dikur me tendera që ktheheshin në histori abuzimi duke shtuar e shtuar fonde për punime të paprashikuara.

Kontrata u bë që për çdo gjë të paparashikuar e mbulon sipërmarrësi privat. Kostot shtesë në bazë të kontratës i mori sipërmarrësi”, theksoi Rama.

Ai garantoi se shqiptarët për këtë investim, nuk do të paguajnë.

“Tuneli sa të jem unë këtu, nuk do të ketë taksë, nuk do kenë tarifë, nuk do kenë tarifë të rrugës. Sa të jem unë, më mbrapa shihni e bëni, por sa të jem unë jo njëherë, që të jemi shumë të qartë”, theksoi Rama.

Tuneli është i gjatë 3.7 kilometra dhe do të shkurtojë distancën mes Dibrës dhe Tiranës në vetëm 2 orë. Për pak javë pritet të mbyllet edhe segmenti Maqellarë-Peshkopi.