Në zgjedhjet vendore të 7 majit 2026 në Enfield, North London, një emër shqiptar është mes kandidatëve për këshilltare bashkiake në zonën Whitewebbs Ward: Eralda Qirjo.
Prej vitesh banore e këtij komuniteti, ajo ka vendosur të ndërmarrë një hap që kërkon kurajë dhe përgjegjësi qytetare: të përfshihet drejtpërdrejt në përfaqësimin e banorëve përballë bashkisë. Kandidon me Partinë Konservatore britanike, por thekson se funksioni i një këshilltari vendor nuk është politika e madhe, por shërbimi i përditshëm ndaj njerëzve.
Në thelb të kandidaturës së saj qëndrojnë çështjet konkrete të jetës në lagje: siguria, shkollat, shërbimet publike, mirëmbajtja e hapësirave, mbështetja për familjet dhe të moshuarit. “Këshilltari duhet të jetë njeriu ku qytetari mund të trokasë pa frikë, që i dëgjon të gjithë njësoj dhe punon që askush të mos mbetet pas,” shprehet ajo.
Në një kohë kur besimi i qytetarëve te institucionet është i brishtë, kandidatura e Eraldës përfaqëson një përpjekje për ta afruar pushtetin vendor me komunitetin. Nëse zgjidhet, ajo synon të jetë zëri i banorëve në këshillin bashkiak dhe të punojë për zgjidhje konkrete të problemeve të përditshme, nga pastrimi i lagjeve te rendi dhe shërbimet sociale.
Motivimi i saj, sipas fjalëve të veta, nuk vjen nga ambicie personale, por nga ndjenja e detyrimit moral ndaj vendit ku jeton. “E kam marrë këtë hap sepse e ndjej si përgjegjësi qytetare. Nuk ka asgjë të komplikuar: thjesht punë, ndershmëri dhe llogaridhënie,” thotë ajo.
Për komunitetin shqiptar në Britaninë e Madhe, kandidimi i Eralda Qirjos ka edhe një domethënie simbolike: një shembull i integrimit dhe i pjesëmarrjes aktive në jetën publike të vendit ku jetojmë. Një shqiptare që nuk mjaftohet të jetë vetëm banore, por kërkon të jetë përfaqësuese dhe shërbyese e komunitetit të saj.
Zgjedhjet vendore në Enfield do të zhvillohen më 7 maj 2026. Për Eralda Qirjon, kjo garë është mbi të gjitha një ftesë për qytetarët: të besojnë se ndryshimi fillon nga lagjja dhe nga njerëzit që janë gati të marrin përgjegjësi.
