Gjykata e Posaçme ka rrëzuar ditën e sotme kërkesën e ish-Ministrit të Shëndetësisë Ilir Beqaj për të dalë nga burgu. Beqaj me anë të avokatit të tij argumentonte se nuk është marrë si i pandehur nga SPAK dhe nuk paraqet rrezik për tu larguar nga vendi, duke qenë se është treguar bashkëpunues gjatë procesit.
Vendimi i GJKKO vjen vetëm dy ditë pasi edhe Gjykata e Lartë refuzoi rekursin e ngritur nga Beqaj mbi masën e sigurisë “Arrest me burg”.
Arrestimi i Beqajt dhe abuzimi me fondet e SASPAC
Lidhur me aferën me abuzimet e fondeve të SASPAC, më 4 korrik 2024 u vu në pranga Ilir Beqaj dhe veç tij në pranga u vu dhe Ermal Kurtulaj, krahu i tij i djathtë dhe Alfred Nikolla. Beqaj u arrestua lidhur me shpërdorimin e fondeve të BE-së, përmes agjencisë SASPAC, të cilën ish-ministri i Shëndetësisë e drejtonte, edhe pse më parë ndaj tij, SPAK kishte nisur hetimet lidhur me koncesionet në shëndetësi. Përmes një deklarate, SPAK sqaroi se nga hetimet rezultoi se kur drejtonte Agjencinë SASPAC, ka ngritur skemë përfitimi me fatura dhe procedura prokurimi fiktive, duke zhvatur fondet e BE (Programi IPA II).
Sipas Prokurorisë së Posaçme, fondet për aktivitetet e agjencisë SASPAC shkonin te fituesit e paracaktuar sipas urdhrave dhe direktivave që jepte Beqaj. Në funksion të kësaj skeme, thotë SPAK, Beqaj ka bashkëpunuar me Ermal Kurtulaj, financieri dhe bashkëpunëtori i ngushtë i tij.
Restoranti “Gzona’ brenda në Kalanë e Tiranës, sipas SPAK, ndonëse ka për administrator një person tjetër, është pronë e fshehur e Beqajt. SPAK thekson se Beqaj ka investuar te restorant “Gzona” prej vitit 2019 shumat 21 411 euro dhe 4 666 110 lekë të reja për blerjen e pajisjeve dhe 34 783 euro si shpenzime qiraje.
j.l./ dita
A i vjen turp ketij faqeziuqe ja nxiu emrin e babushit vet.:”Si vodhet te djahtit,po vjedhim ne te majtit!?”Sukese ne jete ju qe nuk vidhni si ne rilindasit!?”
Pas 11 majit, shohim e bejme.Tani bej si te besh rri rehat ku je.