Periudha shkurt-mars do të jetë e vështirë për Ukrainën. Rusia ka vendosur të ndërhyjë me trupa duke organizuar një ofensivë të re.
Agjencia e lajmeve “Bloomberg”, thotë se sipas funksionarëve dhe personave të tjerë në dijeni të situates, Kremlini synon të tregojë se trupat e tij mund të riorganizohen pas muajsh të tërë humbjesh në terren.
Gjithashtu, Rusia kërkon të ushtrojë presion ndaj Kievit dhe mbështetësve të tij që të pranojnë një lloj armëpushimi duke i lënë Rusisë kontrollin e territoreve që zotëron aktualisht.
Lajmi konfirmon paralajmërimet e Ukrainës dhe aleatëve të saj për një ofensivë ruse përpara se Kievi të marrë furnizimet me tanke amerikane dhe gjermane, të premtuar në ditët e fundit nga Uashingtoni dhe Berlini.
Vendosmëria e Putin pritet të sjellë një përshkallëzim vdekjeprurës të luftës, në një kohë kur Kievi po përgatit një kundërofensivë për të dëbuar forcat e Moskës, vijon më tej “Bloomberg”.
Burimet e cituara nga agjencia shtojnë se, Putin vlerëson se nuk ka alternativë tjetër veçse të vijojë dhe të dominojë një konflikt, të cilin e konsideron jetik në përballjen me Amerikën dhe aleatëve të saj.
