Drejtori i policisë së Elbasanit ndodhet në konferencë për median lidhur me operacionin e ndërmarrë gjatë natës dhe vijuar deri në orët e para të mëngjesit.
Mbi 490 efektivë policie kanë marrë pjesë në operacion si dhe janë kontrolluar dhjetra banesa dhe lokale.
Gjithsej janë firmosur 52 urdhërarreste.
Policia e Shtetit ka arrestuar 45 persona dhe 7 të tjerë janë shpallur në kërkim, në kuadër të një operacioni kundër shpërndarjes dhe prodhimit të lëndëve narkotike.
Në konferencën për gazetarët Ilir Proda, drejtori i Policisë së Elbasanit bëri me dije se gjatë kontrolleve janë sekuestruar 1 kg e 311 gram kokainë, 86 gram heroinë, 1 kg kanabis, një armë zjarri, sasi municioni luftarak si një shumë monetare 51 mln lekë, 15 mijë euro dhe një sasi frangash zviceriane.
“Për një periudhë hetimore strukturat hetimore kanë analizuar detajet e mbledhura nga inteligjenca për një shtrirje kohore prej disa vitesh. Janë administruar në vazhdimësi incidiet dhe provat e reja që siguroheshin. U bë e mundur dokumenti i përfshirjes në aktivitet kriminal të 52 personave për trafik dhe shitje të lëndëve narkotike. Drejtuesi i prokurorisë Elbasan ka nxjerrë 52 urdhra ndalimi që janë ekzekutuar mëngjesin e sotëm.
Gjatë operacionit të sotëm në disa qytete u angazhuan 4902 punonjës policie, u kontrolluan 52 banesa, 18 lokale. Janë ndaluar 45 shtetas dhe 7 të tjerë janë shpallur në kërkim. Gjatë kontrolleve policia ka gjetur 1 kg e 311 gram kokainë, 86 gram heroinë, 1 kg kanabis, mijëra doza kokainë, heroinë, kanabis të sekuestruara gjatë hetimit, një armë zjarri, sasi municioni luftarak si një shumë monetare 51 mln lekë, 15 mijë euro dhe një sasi frangash zviceriane. Janë proceduar 29 shtetas të tjerë. Këta shtetas ushtronin veprimtari kriminale në shitjen dhe prodhimin e lëndëve narkotike.
Ata kishin ndarë zonat e influencës ku ushtronin aktivitetin kriminal, 11 prej tyre kanë qenë të dënuar në fushën e lëndëve narkotike, 15 të tjerë për vepra të tjera penale. 10 shtetas janë pjesë e grupeve kriminale. Është goditur plotësisht një grup kriminal dhe janë goditur pjesërisht tre grupe të tjera kriminale”, deklaroi Proda.
Kryeprokurori i Elbasanit, Kreshnik Ajazi, u shpreh se do të goditen të gjitha rastet abuzive, me fokus të veçantë çmontimin e rrjeteve shpërndarëse të drogave pranë ambienteve të shkollave dhe lokaleve të qytetit.
j.l./ dita
