Koshat plot me mbeturina kanë “pushtuar” rrugët e Parisit, kjo pasi punëtorët e kompanive të pastrimit janë futur në grevë. Shkak i kësaj greve është bërë propozimi i qeverisë Macron për të rritur moshën e pensionit nga 62 në 64 vjeç.
Mbledhësit e mbeturinave ju bashkuan grevës një javë më parë dhe sipas BBC, 5.600 ton mbeturina janë të shpërndara nëpër rrugë.
“Është pis, po vijnë minjë dhe buburreca”, tha një parisien për një radio franceze.
Zyrtari kryesor i këshillit Emmanuel Gregoire tha se situata ishte e komplikuar, por autoritetet po i jepin përparësi ndërhyrjes për sigurinë publike, me fokus në pastrimin e tregjeve të ushqimit, qeseve të koshave të shtrira në tokë dhe garantimin e sigurisë së këmbësorëve.
“Greva shkakton një ndryshim në sjelljen e minjve, ata do të gërmojnë nëpër kosha, do të riprodhohen atje dhe do urinojnë dhe do lënë jashtëqitjet e tyre. Ne kemi një rrezik shqetësues për shëndetin për grumbulluesit e mbeturinave dhe popullatën e përgjithshme”, tha specialisti Romain Lasseur për gazetën Le Parisien.
Punëtorët e pastrimit në Paris do të takohen të mërkurën për të vendosur përfundimisht nëse do e vazhdojnë aksionin e tyre.
j.l./ dita
