Ish-zëvendësministrja e brendshme Rovena Voda, dikur, konsiderohej një prej zyrtareve më energjike dhe më të vlerësuara. Të paktën deri më 13 Korrik të vitit 2021 kur Prokuroria e Posaçme Kundër Korrupsionit shpërndau lajmin për arrestimin e saj.
Lajmi u kthye në sensacion pasi më në fund, struktura e re po godiste në nivele të larta. Dalja në publik e akuzave dhe provave mbi të cilat ishte arrestuar Voda, krijoi ilaritet.
“Ndjehem e lënduar. Ky është një mësim se si nuk duhet ngritur një akuzë” – u shpreh ish Zv. Ministrja e Brendshme.
Në një rrëfim emocional që shpesh herë ndërpritet, Voda ka vendosur të flasë për të vërtetën, sipas saj.
Voda u hetua, gjykua dhe në fund u dënua nën dyshimet se kishte ushtruar ndikim të paligjshëm për punësimin në administratë të një personi. Në këmbim, organi i akuzës tha se ajo kishte marrë 1 mijë euro, 1 aparat celular, dhe… një ark me peshk.
“Ta mësojnë gjithë shqiptarët se arka me peshk nuk ekziston. Është hipotetike”, thotë Rovena Hoda.
Nuk u vërtetua marrja e këtij produkti. Ish-zyrtarja thotë se gjithçka bazohej në përgjime mes dy të pandehurave të tjera që diskutonin mes tyre se mendonin t’i bënin një dhuratë të tillë.
Si për të dëshmuar se gjërat shpesh nuk janë ashtu si duken, regjistrimi i procedimit ndaj Vodës, ndodhi 24 orë pasi ajo kishte marë një vlerësim të rëndësishëm ndërkombëtar: Sapo ishte shpallur si 1 nga 5 gratë e rajonit të Euro-Azisë që “sjellin ndryshime në politikë”.
m.b/dita
