Pas homazheve, janë përcjellë për në banesën e fundit dy fëmijët, 10 dhe 12-vjeç, që u përplasën për vdekje një ditë më parë në qytetin e Durrësit nga Nikoll Radaci që drejtonte automjetin në gjendje të dehur.
Mes dhimbjes dhe zisë, të afërm dhe banorë të zonës së ish Kënetës në qytetin bregdetar u dhanë lamtumirën e fundit dy vogëlushëve.
Në homazhe, ishte e pranishme edhe zv kryeministrja Albana Koçiu, e cila teksa shprehu ngushëllimet, theksoi nevojën për standarde të larta sigurie në çdo hapësirë, duke mos lejuar asnjë neglizhencë.
Aksidenti i rëndë u shënua mesditën e 3 majit në zonën e ish-kënetës në Durrës, ku Nikoll Radaci, 57 vjeç, teksa drejtonte automjetin tip “Mercedes-Benz ML” me shpejtësi të lartë, përplasi tre fëmijët të moshave 8, 10 dhe 12 vjeç, që ndodheshin në trotuar. Dy prej tyre, 10 dhe 12 vjeçari ndërruan jetë në vendngjarje nga përplasja e fortë e makinës, ndërsa 8-vjeçari u dërgua në gjendje të rëndë në spital.
Radaci rezultoi në gjendje të dehur në momentin e aksidentit. Pas ngjarjes, ai u largua nga vendi i aksidentit, por u vu në pranga më pas nga policia. 57-vjeçari rezultoi se ishte ndëshkuar më parë për shkelje të rregullave të qarkullimit rrugor, përfshirë parakalime të gabuara dhe tejkalim shpejtësie ndërsa i ishte pezulluar patenta nga 1 muaj.
Ndaj tij rëndojnë akuzat për “Shkelje të rregullave të qarkullimit rrugor” me pasojë vdekjen e dy personave, “Drejtim i automjetit në gjendje të dehur” dhe “Largim nga vendi i aksidentit”.
j.l./ dita
