Për herë të parë në histori, kryeministri i ri i Britanisë që do dalë nga gara e fortë midis Rishi Sunak dhe Liz Truss nuk do të betohet në Londër por në Balmoral Castle, në Aberdeenshire të Skocisë ku po qëndron monarkja britanike.
Shkak për këtë është bërë gjendja shëndetësore jo e mirë e Mbretëreshës Elizabeth II e cila prej disa kohësh vuan nga dhimbja e gjunjëve duke ja bërë të pamundur lëvizjen.
Boris Johnson ka njoftuar se më 6 shtator do t’i paraqesë zyrtarisht dorëheqjen Madhërisë së Saj, monarkja pritet të ftojë më pas kandidatin fitues të konservatorëve të bëhet Kryeministër dhe të shpallë për publikun emrin e kreut të ri të Downing Street Nr.10.
Mbretëreshës 96-vjeçare do t’i duhej të ndërpriste pushimet e saj në pronën skoceze për të marrë pjesë në ceremoni, por ky plan tani është anuluar.
Kjo do të shënojë herën e parë që e ashtuquajtura puthje e duarve të ndodh jashtë Londrës ose kështjellës së ëindsor.
Mediat britanike raportojnë se janë hartuar plane sekrete për të zhvendosur ceremoninë në Balmoral pasi Mbretëresha është këshilluar të shmangë udhëtimin e kthimit në jug për arsye shëndeti.
“Mbretëresha tani është këshilluar të mos udhëtojë. Por padyshim që askush nuk i thotë Mbretëreshës se çfarë të bëjë dhe në fund të fundit është vendimi i saj, dhe siç e pamë kur ajo u shfaq për herë të tretë në ballkonin e Pallatit Buckingham në Jubile, asaj i pëlqejnë surprizat. Ka disa pjesë të rolit të saj që Princi Charles mund t’i bëjë në emër të saj, por Mbretëresha është e bindur që ajo të emërojë Kryeministrin e ri. Mund të mos jetë zgjidhja më e mirë për ta bërë Mbretëreshën të udhëtojë 1000 milje dhe të kthehet për një vizitë 48-orëshe kur kryeministri mund të shkojnë lehtësisht në Balmoral”, mësohet të ketë thënë një zëdhënës i familjes mbretërore për The Sun.
j.l./ dita
Me mire ne Kalkuta.