Ministria e Arsimit njofton se provimi i Gjuhës Shqipe dhe Letërsisë për më shumë se 26 600 maturantë po zhvillohet normalisht në të gjithë vendin, në kushte të plota sigurie dhe në zbatim të rregullores përkatëse.
Bëhet me dije se provimi është zhvilluar në 144 qendra provimi, në mjedise me qetësi, rregull dhe transparencë.
Në lidhje me publikimin në rrjetet sociale të fotografive të tezës, sqarohet se ky veprim ka ndodhur pasi provimi kishte nisur dhe nuk ka ndikuar në procesin e testimit.
Rasti është evidentuar në një qendër provimi në Qarkun e Kukësit, ku maturanti që publikoi tezën është përjashtuar menjëherë nga provimi.
Masat ndëshkuese do të zbatohen si ndaj maturantëve që shkelin rregulloren, ashtu edhe ndaj gjithë zinxhirit administrues në qendrën përkatëse.
Po ashtu, përgatitjet për Maturën Shtetërore 2026 përfshijnë hartimin e testeve me standarde të larta sigurie, certifikimin e personelit administrues, zhvillimin e konsultimeve në shkolla, shpërndarjen e testeve model nga Qendra e Shërbimeve Arsimore, organizimin e testimeve provë dhe ofrimin e mbështetjes psikologjike për maturantët.
j.l./ dita
