Të shtëna me armë zjarri u raportuan se kanë ndodhur mbrëmjen e sotme në Shëngjin, në zonën e ‘Ranës së Hedhun’.
Burime nga policia bëjnë me dije se 2 persona kanë mbetur të plagosur lehtë në këmbë, pa probleme për jetën, rreth orës 21:30. Gjithashtu thanë se të plagosur kanë mbetur në këmbë Albert Gjinaj, 28 vjeç, banues në Tiranë dhe Gentian Nikolli, 30 vjeç, banues në Thumanë.
Rrethanat dhe motivet mbeten ende të paqarta, teksa grupi hetimor po verifikon dinamikën dhe pritet dëshmia e të plagosurve. Paraprakisht besohet se ka ndodhur një konflikt mes dy grupesh, pas një sherri të çastit. Policia sqaroi se ka disa emra autorësh të identifikuar dhe i ka shpallur në kërkim.
