Mosmarrëveshjet dhe vonesa e qirasë dyshohet se është bërë shkak për vrasjen e një 51-vjeçari dje në Shkodër, i sapokthyer nga Anglia, ku jetonte dhe punonte si emigrant. Viktima është Petrit Vuksani, i cili u qëllua me disa plumba brenda banesës së tij, rreth orës 12:15. Autori i dyshuar i krimit si për ironi të fatit është një i afërm i viktimës, qiraxhiu Lekë Vuksani. Nga hetimet paraprake rezulton se Petrit Vuksani ishte kthyer një muaj më parë nga Britania e Madhe dhe i kishte kërkuar qiranë e prapambetur të dyshuarit. Debati ka denigruar në fyerje dhe konflikt, teksa besohet se viktima i ka kërkuar edhe që të largohet nga shtëpia.
Ngjarja është regjistruar në lagjen “Tom Kola” të qytetit. Policia nuk e ka konfirmuar zyrtarisht dinamikën, por Petrit Vuksani dhe Lekë Vuksani janë konfliktuar fillimisht brenda banesës për çështjen e qirasë dhe në çast autori i përgatitur ka nxjerrë armën tip automatike. Pasi i mori jetën kushëririt të tij, autori mundi të arratisej me shpejtësi nga vendngjarja. Policia ka verifikuar edhe pamjet e kamerave të sigurisë, teksa është ende në ndjekje të tij. Janë ngritur edhe pika kontrolli për të bërë të mundur kapjen e tij.
Të afërmit thanë se 51-vjeçari kishte vetëm një muaj që ishte kthyer nga Anglia, ndërsa vajzat e tij jetojnë në Itali. Ata janë shprehur se Petrit Vuksani i ka shkuar në banesë për t’i kërkuar lekët e qirasë Lekës, por dyshohet se ata kanë debatuar dhe më pas ka ndodhur vrasja.
“Falë reagimit në kohë të Policisë dhe veprimeve të shpejta profesionale hetimore, është bërë i mundur identifikimi i autorit të dyshuar të vrasjes së shtetasit P. V. Shërbimet e Policisë janë vënë në ndjekje të autorit të dyshuar, shtetasit L. V., i cili dyshohet se e ka vrarë me armë zjarri automatike”, njoftoi policia.
Kërkimet janë përqendruar kryesisht në zonat ku mund të fshihet autori, po rreth të 50-ve. Janë kryer kontrolle banesash, mjetesh dhe pika ku mendohet se mund të jetë larguar. Një tjetër dyshim është që Lekë Vuksani ta ketë paramenduar krimin dhe të ketë pasur plan arratisjeje paraprak. Një prej hipotezave është ikja e tij drejt zonës kufitare me ndonjë mjet dhe kalimi drejt Malit të Zi. Po mbahen edhe kontakte me familjarët e të dyshuarit, që nëse njoftohen nga ai ta bindin që të dorëzohet. Akuzat e ngritura janë “vrasje me dashje” dhe “armëmbajtje pa leje”.
