Pikëpyetjet e arrestimit të Ermal Beqirit në Francë: Çfarë mund të kuptohet nga pajisjet e dyshimta GPS që kishte me vete

FRANCË- Ermal Beqiri, në kërkim nga SPAK, është arrestuar të shtunën në Francë në rrethana të dyshimta.

Sipas mediave vendase ai është arrestuar për shkak të një fluturimi të paligjshëm, mbi hapësirën e një centrali bërthamor.

Vetë Beqiri në dëshminë paraprake pas ndalimit, deklaroi se kishte gabuar lartësinë e fluturimit dhe u tha hetuesve se ishte duke folur në telefon me nënën e tij në momentin kur kaloi mbi centralin bërthamor.

Gjithçka në versionin e tij ka ngritur dyshime, përfshirë edhe planin e fluturimit.

Sipas raportimeve të mediave franceze, Beqiri ka qenë i vetëm në momentin e fluturimit.

“Një fakt i pazakontë ishte se gjatë kontrollit fizik, forcat e rendit gjetën tre pajisje AirTag të fshehura në rrobat e tij. Këto pajisje të vogla GPS, të prodhuara nga Apple, përdoren për të lokalizuar dhe gjurmuar objektet ose personat që i mbajnë me vete. Ky detaj i ka orientuar hetuesit drejt një piste tjetër: piloti mund të ketë vepruar nën detyrimin ose kontrollin e një porositësi.

Beqiri u dënua me procedurë të përshpejtuar me 7.000 euro gjobë për fluturim të ndaluar. Më pas ai iu dorëzua Zyrës Qendrore për Luftën kundër Krimit të Organizuar (OCLCO).

Përveçse është një central bërthamor me rëndësi të madhe, Penly është edhe vendi ku po ndërtohen reaktorët e rinj bërthamorë EPR-2, një projekt që ndiqet me interes nga e gjithë bota.

Në vitin 2014, disa centrale bërthamore franceze ishin përgjuar nga dronë. Edhe muajt e fundit, disa dronë të paidentifikuar kanë kaluar mbi objekte të ndjeshme ose ushtarake.

Bëhet fjalë për një seri fluturimesh të organizuara me kujdes, të cilat autoritetet franceze ende nuk ia kanë atribuar zyrtarisht ndonjë shteti të huaj.

Beqiri ka qenë i njohur për lidhjet e tij me Francën, pasi gjatë muajit Janar, teksa SPAK e kërkonte u publikua në foto e tij me presidentin francez Emanuele Macron.

DOSJA E SPAK PËR BEQIRIN

SPAK ka caktuar për Ermal Beqiri masën e sigurisë “arrest me burg”, i cili akuzohet për një sërë veprash të rënda penale: “Konkurrenca e paligjshme përmes dhunës”, “Heqje e paligjshme e lirisë”, “Shkelje e barazisë së pjesëmarrësve në tendera”, e kryer në formën e veçantë të bashkëpunimit dhe grupit të strukturuar kriminal, “Grup i strukturuar kriminal”, “Kryerje të veprave nga organizata kriminale dhe grupi i strukturuar kriminal”, si edhe “Pastrimi i parave”.

Sipas SPAK, ai dyshohet se ka bashkëpunuar me ish-drejtoreshën e AKSHI-t, Mirlinda Karçanaj, Ergys Agasin, Armand Frangun (familjar i kryeministrit Rama) dhe persona të tjerë për paracaktimin e fituesve të tenderëve, si edhe për kërcënimin e bizneseve konkurruese që të tërhiqeshin nga garat.