Porositësi dhe financuesi i atentatit për gjakmarrje të biznesmenit politikan Ardian Nikulaj, dyshohet se ka përdorur si kamuflim për të mos rënë në sy me veprimet e tij, të fejuarën. Vajza rastësisht ka rrëfyer detaje me interes për hetuesit pas ngjarjes, që shërbyen për zbardhjen e krimit, por në fakt që tregoi se ajo nuk ka pasur dijeni për planet e Edmond Haxhias, i arrestuar tashmë në Angli. Qëllimi i tij ishte që të mos linte gjurmë të dukshme, duke përdorur emrin e të fejuarës në kontratë dhe për pak ia doli. Një fakt i tillë është blerja e motorit që përdori killer portugez Ruben Saraiva, për vrasjen e Ardian Nikulajt.
Personi që ka shitur motorin tregon se është marrë në telefon nga një person i cili nuk i ishte prezantuar, por vetëm e kishte pyetur nëse ende e kishte motorin për ta shitur. Pasi ranë dakord, u takuan në zonën e njohur si ‘Kryqëzimi i 21 Dhjetorit’, ku Edmond Haxhia dhe e fejuara e tij e prisnin pronarin e motorit brenda një automjeti tip “Mercedez Benz”. Më pas kanë shkuar të shtëpinë e tij për të parë motorin, të cilin Edmond Haxhia e ka pëlqyer dhe ka vendosur ta blejë, duke e pyetur sërish për çmimin por pa bërë ‘pazar’ për ulje. Pasi kanë rënë dakord, është nënshkruar kontrata e shit-blerjes tek një notere pranë ‘Zogut të Zi’, ku Edmond Haxhia ka kërkuar që motori të vihet në emër të vajzës që e shoqëronte, duke thënë se ishte nusja e tij. Më tej, në dosjen e prokurorisë zbulohet se Edmond Haxhia ka bërë pagesën prej 1 mijë eurosh ndaj personit që i bleu motorin dhe i ka kërkuar ta priste që të kthente lekët në euro, që të mos kishin probleme me kursin e këmbimit.
