Merxhan Çeliku, një nga emrat e përfshirë në dosjen e bujshme të mashtrimeve me “call center”-a, është arrestuar sërish në Dubai, në kuadër të operacionit të zhvilluar nga Interpol Tirana dhe autoritetet në Emiratet e Bashkuara Arabe.
34-vjeçari ishte shpallur në kërkim ndërkombëtar nga SPAK për akuzën e “mashtrimit kompjuterik”, kryer në kuadër të grupit të strukturuar kriminal që dyshohet se zhvati miliona euro nga qytetarë europianë përmes platformave false të investimeve online.
Sipas burimeve, Merxhan Çeliku konsiderohet pjesë e grupit të drejtuar nga Amant Josifi, ish-këshilltar i ish-ministres së Mbrojtjes Olta Xhaçka.
Hetimet e SPAK dhe autoriteteve ndërkombëtare kanë zbuluar se rrjeti i “call center”-ave funksiononte përmes platformave fiktive të investimeve, ku qytetarë nga vende të ndryshme të Europës bindeshin të investonin para në tregje apo kriptovaluta që në fakt nuk ekzistonin. Dëmet e shkaktuara nga skema dyshohet se arrijnë në dhjetëra milionë euro.
Por ndërsa bashkëpunëtorët e dyshuar të grupit po arrestohen njëri pas tjetrit në Dubai, figura kryesore e dosjes, Amant Josifi, vijon të mbetet i lirë në Emiratet e Bashkuara Arabe.
Arrestimi i fundit i Çelikut vjen në një kohë kur autoritetet shqiptare po intensifikojnë përpjekjet për ekstradimin e personave të përfshirë në këtë skemë mashtrimi, e konsideruar si një nga aferat më të mëdha të mashtrimit kompjuterik të zbuluara deri më sot.
