Prokuroria e Tiranës ka paraqitur pretencën për përplasjen mes Leka Zogut, Gjergj Zaharisë dhe Elia Zaharisë. Organi i akuzës ka kërkuar dënime të ndryshme për secilin prej të akuzuarve.
Për Zogun, organi i akuzës kërkon një dënim prej 1 vit e 6 muaj burg, me propozimin që dënimi të konvertohet në shërbim prove nga Gjykata e Tiranës.
Gjithashtu, prokurori Dritan Nushi ka kërkuar 1 vit burg për Gjergj Zaharinë, babain e Elia Zaharias, ndërsa për vetë ish-bashkëshorten e Zogut, Elia Zaharia, prokuroria ka kërkuar 6 muaj burg, gjithashtu të konvertuar në shërbim prove.
Tre të akuzuarit janë përballur me akuzën për “dhunë në familje” dhe çështja është trajtuar nëpërmjet procedurës së gjykimit të shkurtuar, e cila ul dënimin për akuzat e ngritura.
Seanca e radhës, ku do të shpallet vendimi përfundimtar, është caktuar për 13 dhjetor.
Vendimi pritet të jepet nga gjyqtarja Migena Laska.
Elia Zaharia së bashku me babain e saj Gjergj Zaharia, u përfshinë në një konflikt fizik me Leka Zogun gjatë periudhës së divorcit të ish-çiftit.
i.b./dita
