LETRA: Koordinatorët e protestës paraqesin 5 kërkesat edhe te ambasadorët: Mbështesni zgjidhjen paqësore

Protesta masive qytetare po zhvillohen prej 27 ditësh në Tiranë. Ato kanë hyrë në një fazë të re, duke u shtrirë në komunikim me përfaqësitë diplomatike në vend pas reagimit mohues dhe denigrues të klasës politike e cila është e gjitha në shënjestër të protestuesve.

Grupi koordinator i ka dërguar një letër zyrtare ambasadorëve dhe krerëve të misioneve të vendeve perëndimore të akredituara në Shqipëri, ku i informon mbi kërkesat.

Në dokument, përfaqësuesit e lëvizjes e cilësojnë protestën si një mobilizim qytetar paqësor dhe të gjerë, që synon mbrojtjen e demokracisë, shtetit të së drejtës dhe dinjitetit njerëzor.

Ata theksojnë se qytetarët pjesëmarrës po ushtrojnë të drejtën e tyre kushtetuese për të shprehur qëndrimet e tyre në mënyrë paqësore në hapësirat publike në të gjithë vendin.

Pesë kërkesa kryesore të protestuesve

1 – Dorëheqja e kryeministrit dhe e qeverisë aktuale

2 – Krijimi i një ekipi teknik jopartiak, me mandat 12-mujor për të garantuar një proces tranzitor. Gjatë 12 muajve ky ekip, asamble apo këshill do drejtojë disa reforma përpara se vendi të shkojë në zgjedhje të reja. Ndër të cilat:

3 – Reformë kushtetuese që do të miratohet jo me Parlament por me referendum popullor, ku përfshihet

a – ndryshimi i Kodit Zgjedhor për të kthyer zgjedhjen e deputetëve te qytetari jo më me lista kryetarësh.

b – kufizimin e mandateve për postin e kryeministrit në vetëm dy.

4 – Shfuqizimin e ligjit për “investitorët strategjikë” kthimin e kuadrit ligjor për zonat e mbrojtura dhe shfuqizimin e ligjit të njohur si “Paketa e Maleve”

5 – Hartimi i një kontrate të re sociale mes qytetarëve dhe shtetit, përmes konsultimeve me ekspertë të pavarur dhe shoqërinë civile.

Në përfundim të letrës, Grupi Koordinator u bën thirrje ambasadorëve të marrin në konsideratë seriozitetin e protestës dhe të mbështesin një zgjidhje paqësore, demokratike dhe gjithëpërfshirëse të situatës politike në vend.

“Mbetemi në dispozicionin tuaj për çdo komunikim të mëtejshëm”, thuhet në letër.

j.l./ dita