Ilir Meta akuzohet për disa vepra penale. Sipas të dhënave mbi dosjen, ai u hetua nga 6 shërbime sekrete dhe 5 prokurori partnere: SHBA, Austri, Itali, San Marino dhe Qipro.
Mësohet se SPAK ka dhjetra prova dhe fakte të gjurmuara por dhe të siguruara si të pakontestueshme. 5 dëshmitarë kanë qënë miqtë e tij dhe kanë pranuar bashkëpunim me drejtësinë.
Ish-presidenti akuzohet për disa afera, disa episode, disa krime, disa vepra dhe ndryshe nga çdo politikan tjetër është i pashpresë në bankën e të akuzuarve. Por pse mediat, harxhojnë “bateritë” e tyre me formën e ekzekutimit të arrestimit në rrugë?
Arrestimi edhe sikur të ishte bërë në plazh, në mal, në tarracë, në zyrë apo në hotel ku ai fle çdo natë, nuk do ndryshonte asgjë.
Këtë e dinë dhe ata që kanë 24 orë që gjykojnë kapjen për zhelesh të Ilir Metës, njeriut që kapi nga zhelet 34 vjet shqiptarët dhe u zvarrit sa majtas dhe djathtas me çdo karrige pushteti.
Shqip dhe troç: Arrestimi në rrugë është i ligjshëm. Asnjë përjashtim nuk parashikohet në proçedurë për një ish-kryeministër. Ligji është i barabartë për të gjithë. Arrestimi në rrugë i Ilir Metës është 100% ligjor dhe nuk krahasohet me kërcënimet dhe shantazhi që ai kryete çdo javë duke denigruar prokurorë dhe familjet e tyre në media.
Kur policia ekzekuton një vendim gjykate, është vepër penale të kundërshtosh ekzekutimin. Por Ilir Meta nuk pati as integritetin që aktin e tij të fundit në publik ta preste me dinjitet dhe si burrë shteti. Ai dje nuk pati as kurajon e Fatos Nanos apo Ramiz Alisë që shkuan dhe pranuan verdiktin e drejtësisë shqiptare.
Madje as të burgosurit ordinerë nuk reagojnë ashtu si Ilir Meta. Kemi parë qindra kriminel që kanë “dinjitet” gjatë arrestimit.
Në fakt Meta s’ka qenë kurr burrë shteti. Në fakt Meta ka pasur pushtet por asnjëherë personalitet shtetëror.
Duhet të ishte arrestuar 13 vjet më parë, atëherë kur ndante para me ministrin e tij, dhe kur u vranë 4 protestues kundër tij. Atëherë i shpëtoi drejtësisë sepse e mbrojti Berisha dhe më pas e mbrojti edhe Edi Rama.
I gjithë populli e mirëpriti prangosjen e tij. Teatri mediatik vazhdoi në mbrëmje, nga ata që shpresojnë të ringjallet kufoma dhe duan të përdorin funeralin e tij.
