Një studim i ri i publikuar në revistën prestigjioze Nature Climate Change tregon se temperaturat në rritje, të shkaktuara nga ndryshimet klimatike, po nxisin njerëzit të konsumojnë më shumë sheqer, sidomos përmes pijeve të ëmbla dhe ëmbëlsirave të ngrira.
Sipas analizës së të dhënave të blerjeve ushqimore të familjeve amerikane në periudhën 2004–2019, për çdo rritje me 1 gradë Celsius, konsumi i sheqerit rritet me rreth 0.7 gram për person në ditë. Efekti është më i fortë kur temperaturat variojnë mes 20°C dhe 30°C.
“Është e qartë që ndryshimet klimatike do të ndikojnë jo vetëm tek furnizimi me ushqim, por edhe tek zakonet tona të përditshme ushqimore,” tha Pan He, një nga autorët e studimit dhe lektore në Universitetin e Cardiff-it.
Mediat ndërkombëtare theksojnë se kjo rritje e konsumit të sheqerit është më e shprehur te familjet me të ardhura më të ulëta, të cilat jo vetëm kanë akses më të madh tek pijet e lira të ëmbla, por shpesh kalojnë edhe më pak kohë në ambiente me ajër të kondicionuar.
Sipas parashikimeve, nëse ngrohja globale vazhdon me të njëjtin ritëm, deri në vitin 2095 konsumimi i sheqerit mund të rritet me gati 3 gram shtesë në ditë për person, duke rritur rrezikun për obezitet, diabet dhe sëmundje kardiovaskulare.
Ekspertët e shëndetit publik paralajmërojnë se ky është një dimension i ri i krizës klimatike, i cili prek drejtpërdrejt dietën dhe mirëqenien e njerëzve.
j.l./ dita
