Në Kosovë janë të pranishëm mbi katër mijë forca ushtarake paqeruajtëse të KFOR-it. Në 30 maj NATO dërgoi një kontingjent shtesë prej 700 ushtarësh. Vendimi erdhi pas sulmeve të dhunshme të bandave të organizuara paramilitare serbe në Veriun e Kosovës kundër forcave të KFOR-it, si rezultat i të cilave u plagosën mbi 30 ushtarë të forcave paqeruajtëse ndërkombëtarë.
Po kush kërkon me ngulm që situata të vazhdoj të eskalohet dhe pse amerikanët këmbëngulin kaq fort që mos ketë asnjë avancë në këtë drejtim nga Prishtina? Për të kuptuar më qartë, duhet parë, çfarë thonë rusët dhe sigurisht konteksti i luftës në Ukrainê.
Po në 30 maj drejtori i Institutit rus të Zhvillimit Aktual Shtetëror, Dmitri Sollonikov, shkruante: “NATO përgatit grusht shteti në Serbi. Batalioni shtesë i NATO-s në Kosovë mund të çojë në grusht shteti në Serbi”.
Tre ditë pas dërgimit të trupave shtesë, gazeta proqeveritare ruse “Izvestia” shkruante: “NATO po ndjek qëllimet e saj për destabilizimin e Ballkanit. Qëllimi i fundit është shkëputja e plotë e Serbisë nga Rusia, nga ortodoksizmi dhe nga faktori sllav, kalimi në anën e Perëndimit dhe njohja e Kosovës”.
Rusët duken të shqetësuar. Po pse?
Eksperti i gjeopolitikës, diplomati i njohur Shaban Murati, në një analizë botuar në gazetën DITA, shpjegon:
“…Përtej një naiviteti diplomatik dhe propagandistik, alarmi i ri rus për forcat shtesë të NATO-s në Kosovë dëshmon shqetësimin e madh të Kremlinit se zhvillimet e fundit në Veriun e Kosovës dhe në Ballkanin Perëndimor nuk po ecin në drejtimin e planifikuar nga Rusia.
Kremlini shpresoi që nëpërmjet provokacioneve të qëllimëshme të presidentit serb Vuçiç në Veriun e Kosovës me intrigën e tij bizantine “ngriva-shkriva” të tensioneve në Veri, do të arrihej qëllimi strategjik rus i shkaktimit të një konflikti të armatosur midis Serbisë dhe NATO-s në Kosovë“.
Pra, eskalimi atje, qartazi u intereson atyre që kanë qenë përherë opozita e egër historike e interesave shqiptare në rajon. Diçka që Albini shpresohet ta kuptojë. Murati shkruan më tej:
“Qëllimi strategjik i Rusisë është që t’i hapë NATO-s një vatër lokale lufte me konflikt të armatosur midis Kosovës dhe Serbisë. Kjo i duhet Moskës në këtë periudhë krize ushtarake dhe vështirësish të panumërta, që po kalon për shkak të agresionit të gjatë rus në Ukrainë, dhe për të dobësuar NATO-n në prapavijat e saj ballkanike…”
Analiza e plotë mund të lexohet duke klikuar KËTU
n.s. / dita
