Mbretëria e Bashkuar i ka dorëzuar Forcave të Armatosura të Ukrainës një numër ende të panjohur të njësive të raketës me rreze të gjatë “Storm Shadow”, sipas CNN.
Burimet pohojnë se Ministria Britanike e Mbrojtjes e ka vënë në dispozicion predhën, për kundërsulmin e pritshëm të paralajmëruar nga presidenti Volodímir Zelenski.
Kjo raketë, e zhvilluar nga Mbretëria e Bashkuar dhe Franca, ka një rreze veprimi prej rreth 300 kilometrash. Me autonominë e saj, ajo mund të arrijë objektiva brenda territorit ukrainas të pushtuar nga Rusia, Donbas, Zaporizhia ose Kherson. Sipas mediave, Londra ka marrë një zotim nga autoritetet ukrainase se nuk do të përdoret për të ndëshkuar pozicionet brenda kufijve zyrtarë rusë.
“Storm Shadow” mund të strehojë një kokë lufte prej 450 kilogramësh, me të cilën mund të godasë objektiva strategjikë të largët, si qendrat e komunikimit dhe komandimit, aeroportet, portet dhe stacionet e energjisë, kapanone municionesh apo ura.
Kjo armë e re mund të nënkuptojë një ndryshim në ekuilibrin e luftës, sipas ekspertëve të konsultuar nga CNN, dhe plotëson kërkesat e raketave me rreze të gjatë veprimi të bëra nga pala ukrainase që nga fillimi i pushtimit rus.
Guillermo Pulido, një kandidat për doktoraturë në Studime Strategjike dhe një analist për Revistën Ejércitos, shpjegoi për “El Periódico de España”, se kjo armë e re është thelbësore në kundërsulmin e shpallur.
Raketa “Shadow Storm”, çfarë thotë Zelenski
Këtë javë, presidenti Zelenski i tha BBC-së se vendi i tij nuk është ende gati për kundërsulmin e pritshëm pasi “megjithëse ai mund të ishte i suksesshëm, ne do të humbnim shumë njerëz dhe kjo nuk është e pranueshme”.
“Duhet të presim. Na duhet pak më shumë kohë”, tha presidenti ukrainas.
Edhe pse Sekretari i Përgjithshëm i NATO-s, Jens Stoltenberg, ka thënë se pjesa më e madhe e armëve të kërkuara nga Ukraina ishte tashmë në vend, ka për shembull, njësi tankesh Leopard që ende nuk kanë mbërritur. Spanja premtoi dhjetë nga këto tanke, por Forcat e Armatosura të Ukrainës kanë marrë katër.
Për Pulido, megjithëse “Shadow Storm” (Stuhia në hije) është thelbësore, Ukraina gjithashtu ka nevojë për njësi inxhinierike luftarake për “operacionin e shpërthimit” që pritet në rajonet Kherson ose Zaporizhia.
“Duhet të përpunoni një koreografi shumë të komplikuar për të nisur kundërsulmin që mund t’i japë fund luftës. Koha e nevojshme për përgatitjen dhe trajnimin e këtyre njësive shumë të specializuara, është arsyeja themelore për dyshimet dhe zbutjen e shprehur nga Zelenski” – thotë ai.
a.q. / dita
