Të drejtat e njeriut dhe standardet e mirëqeverisjes në Shqipëri ishin në qendër të vëmendjes gjatë prezantimit të Raportit Vjetor 2025 të Avokatit të Popullit, një dokument kyç që analizon situatën e respektimit të lirive dhe të drejtave themelore në vend. Aktiviteti u zhvillua në Pallatin e Kongreseve, me mbështetjen e projektit të Qeverisë Zvicerane PACEP II, dhe bëri bashkë përfaqësues të institucioneve shtetërore, trupit diplomatik, organizatave ndërkombëtare, shoqërisë civile dhe mediave.
Në fjalën e tij të hapjes, Avokati i Popullit, Endrit Shabani, theksoi rolin thelbësor të institucionit në mbrojtjen e qytetarëve nga abuzimet administrative dhe në promovimin e standardeve demokratike. Ai nënvizoi se raporti shërben jo vetëm si një analizë e situatës aktuale, por edhe si një udhërrëfyes për institucionet publike në drejtim të përmirësimit të politikave dhe praktikave që lidhen me respektimin e të drejtave të njeriut.
Aktiviteti u përshëndet gjithashtu nga Zëvendëskryetarja e Kuvendit të Shqipërisë, Klodiana Spahiu, e cila vuri në dukje rëndësinë e bashkëpunimit ndërinstitucional për forcimin e mekanizmave të mbikëqyrjes parlamentare. Ambasadorja e Zvicrës në Shqipëri, Sh.S. Ruth Huber dhe Kreu i Delegacionit të Bashkimit Evropian në Shqipëri, Sh.T. Silvio Gonzato, theksuan mbështetjen e partnerëve ndërkombëtarë për konsolidimin e shtetit të së drejtës dhe për avancimin e standardeve të të drejtave të njeriut në vend.
Pjesa e parë e aktivitetit, e moderuar nga gazetari Lutfi Dervishi, u fokusua në prezantimin e gjetjeve kryesore të raportit dhe u pasua nga një sesion pyetje-përgjigje me gazetarët.
Gjatë sesionit tematik, komisionerët e Avokatit të Popullit paraqitën analizat sektoriale të raportit. Erinda Meli u ndal te çështjet e mirëqeverisjes dhe shtetit të së drejtës, duke theksuar problematikat që lidhen me llogaridhënien e administratës dhe të drejtën e pronës. Besnik Deda trajtoi aspektet e të drejtave civile dhe politike, përfshirë procedurat policore, kushtet në institucionet e vuajtjes së dënimit, azilin dhe vonesat në sistemin e drejtësisë. Ndërsa Vilma Shurdha prezantoi gjetjet mbi të drejtat ekonomike dhe sociale, me fokus në ndihmën ekonomike, strehimin, kujdesin shëndetësor dhe mbrojtjen e grupeve vulnerabël.
Një vëmendje e veçantë iu kushtua edhe komenteve dhe rekomandimeve të përfaqësuesve të shoqërisë civile, të cilët sollën perspektiva konkrete nga terreni mbi sfidat në zbatimin e të drejtave të njeriut. Kontributi i tyre u vlerësua si thelbësor për pasurimin e raportit përfundimtar dhe për forcimin e dialogut ndërmjet institucioneve dhe aktorëve jo-shtetërorë.
