Reshjet e dendura të dëborës kanë vijuar me intensitet të lartë gjatë ditës së sotme në shumë zona të vendit. Për shkak të reshjeve mësohet se kanë nisur problematikat në qarkullimin e makinave në Rrugën e Arbrit.
Situata më e vështirë paraqitet më së shumti nga Bulqiza në drejtim të urës së Vashës.
Intensiteti i reshjeve ka bërë që trashësia e borës të arrijë deri në 5 centimetra, ndërsa drejtuesit e mjeteve janë gjendur të papërgatitur teksa në rrugë nuk ka asnjë borëpastruese ndërsa autoritetet vendore ju bëjnë apel drejtuesve të mjeteve të tregohen të kujdesshëm.
Reshjet e dëborës kanë “pushtuar” dhe rrethin e Librazhdit. Mësohet se në Fushë Studë, në njësinë administrative Stebleve dhe të gjithë fshatrat malorë të Librazhdit tashmë dëbora ka zbardhur gjithçka. Raportohet se bora arrin në trashësinë 5-15 cm. Aktualisht nuk ka situata problematike, por ekipet e emergjencave dhe shërbimet publike janë në gatishmëri për t’iu paraprirë çdo situate.
Po ashtu dëbora ka rënë edhe në fshatrat malorë të Elbasanit e Gramshit dhe ndërkohë vazhdon të bjerë me intensitet mesatar në lartësinë mbi 750 m mbi nivelin e detit.
Kjo situatë atmosferike do të na shoqërojë deri në orët e vona të mbrëmjes kur pritet përmirësim gradual i kushteve të motit.
j.l./ dita
