Një ekip i televizionit lokal në Kosovë, ATV, është sulmuar në Zveçan teksa ishin duke raportuar situatën.
Mësohet se makina është sulmuar dhe ekipi ka marrë lëndime të lehta trupore. Asociacioni i Gazetarëve të Kosovës ka shprehur shqetësim për këtë dhe rastet e tjera të sulmeve dhe gazetarëve në veri par rritjes së tensioneve atje.
Kujtojmë që ditën e sotme policia e Kosovës arrestoi në Mitrovicën e Veriut një prej organizatorëve të sulmeve ndaj KFOR-it.
“Policia e Kosovës sot ka arrestuar Milun Milenkoviç-Llune, një nga udhëheqësit e formacionit kriminal ‘Mbrojtja Civile’ dhe prijësin e bandave kriminale që ndër vite kanë terrorizuar qytetarët tanë, kanë sulmuar pjesëtarët e Policisë së Kosovës dhe institucionet e Republikës së Kosovës”, tha ministri i Brendshëm, Xhelal Sveçla në Facebook.
Gjatë këtij aksioni janë lënduar lehtë tre policë. Pas kësaj në Mitrovicën e Veriut u dëgjuan menjëherë sirenat e alarmit. Po ashtu filluan grumbullimet e qytetarëve serbë në qytet. REL raportoi për automjete të blinduara në “Lagjen e Boshnjakëve”.
“Automjetet janë parë në rrugën që të çon në drejtim të shkollës së mesme teknike, ku janë mbledhur serbët lokalë”, raportoi Radio Evropa e Lirë.
Po ashtu mes qytetarëve të mbledhur janë dëgjuar thirrje “tradhti” dhe kanë ofenduar Presidentin serb, Aleksandër Vuçiç.
o.j/dita
