Humbja në derbi ndaj Milan-it ka nxjerrë në pah problemet e Inter-it në repartin e sulmit, duke detyruar trajnerin Cristian Chivu të pranojë mundësinë e afrimit të një sulmuesi të pestë.
Tekniku zikaltër u detyrua të luante vetëm me Marcus Thuram në majë të sulmit, pasi mungesës së kapitenit Lautaro iu shtuan edhe problemet fizike të Bonny dhe Pio Esposito.
Kjo situatë e riktheu vëmendjen te nevoja për përforcime, duke qenë se edhe humbja e fundit e Interit në kampionat kishte ardhur pikërisht për shkak të mungesave të theksuara në vijën e parë.
Në këtë kontekst, javët e fundit është përfolur gjerësisht për një rikthim të mundshëm të ish-kapitenit Mauro Icardi. Sulmuesi argjentinas ka deklaruar hapur dëshirën e tij për t’u rikthyer në Milano për të mbyllur një aventurë që përfundoi në mënyrë të dhimbshme vite më parë.
Pavarësisht kësaj, drejtuesit nuk kanë ndërmarrë ende hapa konkretë, ndërsa drejtori sportiv Dario Baccin po vlerëson edhe alternativa të tjera.
Në listën e dëshirave të klubit zikaltër ndodhen emra si dyshja e Monza-s, Varela dhe Robinson, si dhe talenti 19-vjeçar i Cagliari-t, Paul Mendy.
Si një opsion mbetet edhe Federico Chiesa, i cili nuk po gjen hapësira te Liverpool dhe mund të ofrojë një zgjidhje të dyfishtë, si në qendër të sulmit ashtu edhe në krahë.
j.l./ dita
