Sëmundjet e zemrës (kardiovaskulare) janë ndër patologjitë më të shpeshta të evidentuara në mbarë botën. Po ashtu, edhe ndërlikimet që vijnë prej tyre janë të larta. Sëmundja kardiovaskulare i referohet çdo sëmundjeje të zemrës, çdo sëmundjeje vaskulare të trurit, ose sëmundjeje të enëve të gjakut.
A e dini se zemra juaj është sa madhësia e grushtit tuaj, dhe se ka muskujt më të fortë të trupit? Por edhe pse e fortë, zemra juaj mund të bëhet e prekshme nga faktorët e rrezikut, si pirja e duhanit, dieta jo e shëndetshme, stresi, etj.
Kontrolli i rregullt i këtyre faktorëve të rrezikut dhe monitorimi i tensionit tuaj arterial, mund të zvogëlojë rrezikun e një individi për të patur sëmundje kardiovaskulare.
Ka shumë faktorë rreziku që shoqërohen me sëmundje koronare të zemrës dhe goditje në tru. Disa faktorë rreziku, siç është historia familjare, nuk mund të modifikohen, ndërsa faktorët e tjerë të rrezikut, si presioni i lartë i gjakut, mbipesha, pasiviteti fizik, etj, mund të mbahen nën kontroll, duke reduktuar kështu mundësitë për të patur sëmundje të zemrës.
“Ju nuk do të zhvilloni sëmundje kardiovaskulare nëse keni një faktor rreziku. Por sa më shumë faktorë rreziku të keni, aq më e madhe është mundësia që të sëmureni nëse nuk merrni masa për të modifikuar këta faktorë rreziku, si dhe të parandaloni që ata të dëmtojnë shëndetin e zemrës suaj”, bëjnë me dije ekspertët e shëndetit publik.
Faktorët e riskut që mund t’i mbajmë nën kontroll përfshijnë:
Pasivitetin fizik
Dietën jo të shëndetshme
Tensionin e lartë të gjakut
Përdorimin e duhanit
Kolesterolin e rritur
Obezitetin dhe mbipeshën
Faktorët e rrezikut jo të modifikueshëm përfshijnë:
Histori familjare
Diabetin
Faktorë të tjerë të zakonshëm që nuk mund t’i ndryshomë dot:
Mosha
Thjesht plakja është një faktor rreziku për sëmundjet kardiovaskulare; rreziku i goditjes në tru dhe atakut në zemër dyfishohet çdo dekadë pas moshës 55 vjeç.
Gjinia
Gjinia është domethënëse, një mashkull rrezikohet më shumë të preket nga sëmundjet e zemrës sesa një femër para menopauzës. Por, pasi kalon menopauzën, rreziku i një femre është i njëjtë me atë të një mashkulli. Rreziku nga goditja në tru është i njëjtë si për meshkujt dhe për femrat.
Statusi socio-ekonomik
Të qenët i varfër, pa marrë parasysh vendndodhjen në botë, rrit rrezikun për sëmundje të zemrës dhe goditje në tru. Po ashtu edhe kushte të tilla, si stresi, izolimi shoqëror, ankthi dhe depresioni, shtojnë rrezikun për sëmundjet kardiovaskulare.
p.k\dita
