“Lufta e Tretë Botërore mund të fillojë nëse tanket ruse do të mbërrijnë në Kiev”.
Kështu paralajmëron ministri Italian i mbrojtjes, Guido Crosetto, duke iu përgjigjur kërcënimeve nga Moska se konflikti do të përshkallëzojë ndjeshëm me dërgimin e tankeve dhe armatimeve të tjera perëndimore.
“Lufta e Tretë Botërore do të niste menjëherë në momentin kur tanket Ruse do të mbërrinin në Kiev dhe në kufijtë e Europës. Të sigurojmë që ata të mos arrijnë asnjëherë, është mënyra e vetme për ta ndaluar Luftën e Tretë Botërore”, tha Crosetto gjatë një eventi në Romë.
Ministri Italian shtoi ndër të tjera se javën e ardhshme mund të firmoset një dekret i ri për të dërguar ndihma në Ukrainë.
Nga ana tjeter, Kim Yo-jong, motra e liderit të Koresë së Veriut Kim Jong-un ka kritikuar vendimin e Shteteve të Bashkuara për të dërguar tanke në Ukrainë.
Sipas saj, pas këtij vendimi të SHBA-ve, “qëndron qëllimi djallëzor i amerikanëve për të arritur objektivin e tyre hegjemonik dhe për të shkatërruar Rusinë.
Sipas raportimeve, Kim Yo-jong, ka thënë se SHBA e ka kaluar vijën e kuqe.
“Unë nuk dyshoj se çdo pajisje ushtarake me të cilën mburren SHBA-ja dhe Perëndimi do të digjet në copa përballë shpirtit të paepur luftarak dhe fuqisë së ushtrisë dhe popullit heroik rus,” tha ajo, duke shtuar se Koreja e Veriut gjithmonë do qëndrojnë në të njëjtën llogore me Rusinë.
Komentet e saj vijnë pasi Joe Biden bëri të ditur se do të dërgonte 31 tanke M1 Abrams në Ukrainë, duke përmbysur argumentet prej muajsh të Uashingtonit se ato mjete ishin shumë të vështira për t’u mirëmbajtur nga vendasit.
Koreja e Veriut është i vetmi vend, përveç Rusisë dhe Sirisë, që njeh pavarësinë e Donetskut dhe Luhanskut, dy rajone separatiste të mbështetura nga Rusia në Ukrainën lindore.
o.j/dita
