Uashingtoni zyrtar ka prova se trupat koreano-veriore janë të pranishme në Rusi. Ka qenë sekretari i Mbrojtjes, Lloid Ostin që e ka bërë deklaratën.
“Kemi prova se trupat e Koresë së Veriut ndodhen në Rusi. Çfarë po bëjnë atje? Kjo mbetet për t’u parë. Janë gjëra që duhet t’i zbulojmë”, ka thënë Ostin.
Komentet e tij përbëjnë konfirmimin e parë publik nga Uashingtoni të denoncimeve të bëra më herët nga Ukraina dhe Koreja e Jugut.
Disa orë më parë, shefi i shërbimit sekret ushtarak të Ukrainës, Kirilo Budanov tha se njësitë e para koreano-veriore do të mbërrijnë në rajonin rus të Kurskut këtë të mërkurë, për të ndihmuar trupat vendase që t’i bëjnë rezistencë inkursionit ukrainas.
Më herët gjatë tetorit, Budanov kishte bërë të ditur se grupi i parë do të konsistonte në 2.600 ushtarë nga rreth 11 mijë trupa koreano-veriore që do të mbërrijnë në Rusi, të cilat do të jenë gati të angazhohen në konflikt nga data 1 nëntor.
Ndërsa presidenti Zelensky deklaroi se dy brigada koreano-veriore me një personel prej 6 mijë trupash po i nënshtrohen stërvitjes në Rusi. Sipas tij, disa oficerë të dërguar nga Peniani ndodhen tashmë në territoret e pushtuara të Ukrainës.
Ndërkohë, Koreja e Jugut po shqyrton mundësinë e dërgimit të një grupi ushtarësh nga njësitë e inteligjencës në Ukrainë, pas të dhënave për përfshirjen në konflikt të fqinjit të saj.
Sipas agjencisë lokale të lajmeve “Jonhap”, trupat koreano-jugore do të mund të analizojnë taktikat ushtarake të Penianitdhe kapacitetet luftarake të tij.
i.b./dita
