Tensioni midis Kremlinit dhe liderit të “Grupit Wagner”, Yevgeni Prigozhin, janë rritur ditët e fundit. Ndër shkaqet kryesore, municioni i pakët që arrin te grupi paraushtarak, sipas Prigozhin.
Javën e kaluar, i lodhur nga premtimet që nuk dhanë fryte plotësisht, Prigozhin siguroi se njësia e tij do të largohej nga pozicionet e saj në Bakhmut, skena e luftimeve më të ashpra në muajt e fundit në Ukrainë.
Në deklaratat e tij të fundit, Prigozhin i ka kërkuar ministrit rus të Mbrojtjes, Sergei Shoigu, të udhëtojë në këtë qytet në juglindje të Ukrainës për të “vlerësuar situatën e vështirë operacionale” në fushën e betejës.
“Duke marrë parasysh situatën e vështirë operacionale dhe përvojën tuaj të gjerë luftarake, ju kërkoj të vini në territorin e Bakhmutit”, ka kërkuar ai përmes një letre të postuar në llogarinë e tij në “Telegram”.
Një mesazh që fare mirë mund të interpretohet si një tallje me ministrin Shoigu, pasi edhe pse ka gradën gjeneral, nuk ka shërbyer asnjëherë në radhët e ushtrisë ruse.
Lidhur me këtë front në Bakhmut, udhëheqësi “Wagner” ka pranuar “një seri kundërsulmesh të suksesshme nga armiku”. Informacioni që Ministria e Mbrojtjes ruse i mohon, sepse “nuk përputhet me realitetin”.
Kritikat nuk kanë ndalur tek ministri rus. Ato kanë arritur edhe te vetë presidenti, Vladimir Putin. Ditët e fundit, ndërsa Moska mbajti paradën e Ditës së Fitores në Sheshin e Kuq, Prigozhin iu referua liderit rus si një “gomar që sillet si gjysh i mirë”.
Edhe pse më parë kishte sulmuar zyrtarë të lartë ushtarakë, kjo është hera e parë që ai e bën këtë drejtpërdrejt kundër Putinit. Për ndihmën e kërkuar nga Moska, Prigozhin siguron se kanë marrë vetëm 10% të armëve që kishin kërkuar. “Ne thjesht jemi mashtruar në mënyrë të hapur. Do të vazhdojmë edhe disa ditë, do të luftojmë dhe pastaj do të shohim se çfarë do të bëjmë”, tha ai.
