Një ngjarje e rëndë është regjistruar mbrëmjen e djeshme në Korçë, ku një i mitur është goditur me sende të forta në kokë. 14-vjeçari është goditur nga disa bashkëmoshatar si pasojë e një konflikti të çastit.
Ai është dërguar në spitalin e Traumës në gjendje të rëndë shëndetësore. Ngjarja ndodhi në lagjen nr. 12, Korçë ku sipas policisë ishte një konflikt i çastit me bashkëmoshatarë të tjerë.
Konflikti ka nisur disa ditë më parë midis dy grupeve mes adoleshentëve. Grupi në të cilin bënte pjesë 14-vjeçari, është konfliktuar fizikisht me një prej adoleshentëve të tjerë. Ndërsa mbrëmjen e djeshme duket se të rinjtë e tjerë janë hakmarrë duke lënë të plagosur rëndë 14-vjeçarin.
Pasi ka marrë mjekim në spitalin e Korçës 14-vjeçari është transportuar drejt Tiranës në gjendje të rënduar për mjekim më të specializuar.
Ndërkohë, sipas asaj që thotë Policia në komisariatin e Korçës janë shoqëruar disa persona të cilët janë marrë në pyetje në lidhje me ngjarjen.
Policia ka marrë në pyetje 15 të mitur të moshave 13 deri në 15 vjeç.
Marrja në pyetje e të miturve është bërë nën shoqërinë e prindërve dhe psikologes.
Për veprat penale me pasojë plagosje dhe vrasje, përgjegjësia penale fillon që në moshën 14-vjeç, sipas kodit penal shqiptar.
j.l./ dita
