Shqipëria rrezikon të regjistrojë pjesëmarrjen më të ulët të historisë në votime, kur duhen edhe pak minuta nga mbyllja e qendrave, megjithatë shumë zona nuk kanë raportuar plotësisht.
Rreth 35% e shqiptarëve rezulton se kanë marrë pjesë në zgjedhje deri në orën 17, sipas të dhënave të pjesshme të Komisionit Qendror të Zgjedhjeve, të cilat i referohen raportimeve nga gjysma e qendrave të votimit.
Pjesëmarrja në zgjedhjet për pushtetin vendor 2023 rezulton se është 9.3% më i ulët se sa pjesëmarrja në zgjedhjet e vitit 2021.
Pjesëmarrjet më të larta shënohen në bashkitë Kukës e Pustec (50%), Has (48%) dhe Devoll (47%). Pjesëmarrja më e ulët në vend shënohet në bashkinë Finiq në jug të vendit (17%), pasuar nga Fieri, 22% dhe Dropulli, 25%.
Mes bashkive të mëdha, pjesëmarrja ka rënie në Tiranë. Deri në orën 17, pjesëmarrja ishte 37%, ose 14% më pak se sa pjesëmarrja në zgjedhjet e vitit 2021 në të njëjtën orë.
Në Elbasan, pjesëmarrja ishte 34%, nga 45% që ka qenë më 2021.
Rënia më e madhe e pjesëmarrjes vërehet në Fier, (minus 17% në krahasim me vitin 2021), si dhe në bashkinë e vogël të Skraparit, (minus 14%).
Në Shkodër pjesëmarrja ishte 32%, 6 pikë më pak se sa zgjedhjet e kaluara.
Në Vlorë, ku pjesëmarrja ka qenë historikisht shumë e ulët, kësaj here duket se po thyhet një rekord tjetër negativ. Deri në orën 17, pjesëmarrja ishte 28%, nga 34 që ka qenë më 2021.
Ndërsa ora e mbylljes së kutive të votimit po afron, palët politike u shfaqën në televizione me thirrje për mbështetësit që të dalin të marrin pjesë në votime.
Partia Socialiste u bëri thirrje veçanërisht të moshuarve, të cilët, nuk arritën të votojnë në orët e para të mëngjesit për shkak të defekteve në identifikimin elektronik të votuesve dhe u kthyen në banesa pa votuar.
Zgjedhjet për pushtetin vendor historikisht kanë shënuar pjesëmarrje më të ulët se sa zgjedhjet parlamentare. Por ecuria e deritanishme sugjeron se pjesëmarrja këtë herë mund të jetë edhe më e ulët se në zgjedhjet lokale të së shkuarës.