Shumë shpejt tullumbacet e rrezikshme me oksid azoti që shiten lirshëm nëpër lokalet e Tiranës do të ndalohen me ligj.
Lajmin e bëri me dije Ministri i Brendshëm Taulant Balla në Kuvend, i cili tha se ky produkt do të vendoset në kontrollin e shtetit deri sa të bëhet ligji që do e cilësojë si drogë.
“Është lëndë e palejuar edhe pse ligji ynë e ka lejuar. Ka disa konventa që e konsiderojnë si lëndë që duhet të vendoset nën kontrollin e shtetit. Do e ndalojmë, derisa të bëjmë ligjin e ri. Do bazohemi në konventat që e cilësojnë si drogë”– tha Balla në Kuvend.
Tollumbacet e mbushura po përdoren si drogë nga adoleshentët.
Alarmi u lëshua pak ditë më parë nga mjeku Adrian Fandi, i cili tregoi se kjo lëndë përmban dy kimikate në formë gazi që japin probleme mendore dhe neurologjike.
Përdoruesi mund të ketë halucinacione, madje shkon në vetëvrasje. Në disa raste konsumatorët kanë tentuar të hidhen nga ballkoni.
Përdorimi i gazit helium dhe protoksidit të azotit deri tani ka qenë në shitje të lirë.
