Mijëra qytetarë marshojnë në rrugët e kryeqytetit në ditën e 13-të
Mijëra qytetarë janë mbledhur ditën e sotme për të 13-tën ditë radhazi para Kryeministrisë.
Protesta e tyre ka shënuar rritje të ndjeshme të pjesëmarrjes ditët e fundit.
Në protestë janë përfshirë edhe emigrantë. Qindra emigrantë kanë protestuar gjatë ditëve të fundit në qytete si Milano, Firence, Bolonja, Gjenova, Bruksel, Londër dhe Berlin.
Me pankarta në duar dhe flamuj kuqezi, ata kanë bërë thirrje për ndryshim, ndërsa protesta ka bashkuar studentë, të rinj, pensionistë, fëmijë, profesionistë, emigrantë, turistë dhe aktivistë.
Nën thirrjet “Revolucion” dhe “Nesër më shumë”, protestuesit kanë deklaruar se do të vijojnë qëndrimin e tyre deri në dorëheqjen e kryeministrit Edi Rama.
Ata kanë paralajmëruar gjithashtu një tubim më 13 qershor, ku u është bërë thirrje edhe emigrantëve të diasporës që të bashkohen.
Gjatë protestës janë dëgjuar thirrje si “Rama n’burg, Berisha n’burg”, “Rama ik”, “Atdheu nuk shitet”, “Shqipëri e Re”, “Ju erdhi fundi” dhe “Shqipëria është e jona”.
Para nisjes së fjalimeve, protestuesit mbajtën 1 minutë heshtje në nder të dëshmorëve të luftës së Kosovës.
Përfaqësuesja e grupit koordinues bëri thirrje për bojkotim të të gjithë medieve të shitura, duke kërkuar mirëkuptim për mediet që janë në shesh duke bërë detyrën. “Ata janë pjesë e jona”, tha ajo.
Po ashtu, ajo tha se edhe administrata që mori pjesë në takimin me Ramën nuk e do qeverinë po ndihet e detyruar, duke iu bërë thirrje të bashkohen në protestë.
Një tjetër protestues ngriti shqetësimin për drejtësinë që e cilësoi të korruptuar. Sipas tij, SPAK e ka të gjithë mbështetjen e qytetarëve shqiptarë për të bërë drejtësi e për të hetuar politikanët që kanë vjedhur taksat e shqiptarëve.
Pas fjalimeve, qytetarët nisën marshimin e tyre nëpër rrugët e kryeqytetit me thirrjen “Rama n’burg, Berisha n’burg”.
