Nga Parisi, aty ku po mbahen Lojërat Olimpike 2024, kryetari i Bashkisë së Tiranës, Erion Veliaj ka treguar emocionet e medaljes së parë olimpike, që Shqipëria mori dje në sportin e mundjes, me përfaqësues sportistin e Sport Klub Tirana, Chermen Valiev.
Në një intervistë televizive, ai u shpreh se është krenar për rezultatin e arritur në Paris, nga një klub që sot është kozmopolitan, me përfaqësues nga kombësi të ndryshme, që garojnë për ekipin tonë.
“Jemi vërtet shumë të emocionuar, ishte qershia mbi tortë e një fundjave të paharruar në Paris. Pas 112 vitesh shtet marrim medaljen tonë të parë olimpike, si Sport Klub Tirana i ekipit Shqipëria. Jam vërtet krenar që ky organizim, kjo energji, prodhoi më në fund një medalje të parë historike për Shqipërinë. Ndoshta i hap rrugën medaljeve të tjera. Jam vërtet krenar për çunat dhe gocat e Sport Klub Tirana, që përfaqëson Tiranën kozmopolitane, që nuk është më ajo Tirana e viteve 90, kur ne të gjithë ishim nga i njëjti vend. Tirana sot është kozmopolitane dhe ekipi ynë është kozmopolitan”, deklaroi Veliaj.
Ai tha se rezultati i arritur një ditë më parë, vjen si shkak i një pune të nisur që pas Lojërave Olimpike të Tokios, duke mbështetur sportistët në disiplinën e mundjes me trajtime financiare, trajnime dhe akomodim.
“Kishim pritshmëri tek mundja. U fokusuam te akomodimet, trajnimet, grumbullimi i ekipit dhe trajtimi financiar. Dhe unë besoj që kjo strategji ia vlejti, prodhoi një medalje për Shqipërinë. Besoj që kjo duhet të jetë strategjia dhe në të ardhmen. Emocioni ishte i jashtëzakonshëm”, theksoi kryebashkiaku.
Një përgjigje ai e pati edhe për kritikët që janë marrë më tepër me origjinën e sportistit të Sport Klub Tirana. Veliaj deklaroi se Shqipëria është një vend europian, që ka hapur dyert për sportistët e huaj, ashtu si shumë ekipe të tjera që marrin pjesë në Lojërat Olimpike.
“Duhet të mësohemi me një Shqipëri që talentet janë gati të vijnë në këtu. Talente që mund të kenë histori të ndryshme nga problematika të caktuara me vendin e e tyre, gjejnë te Shqipëria, një vend europian, që në njëfarë mënyre i ka hapur dyert dhe i ka bërë pjesë të tyre. Është diçka që është vënë re në të gjitha ekipet. Keto debate jane të dështuara, të një shekulli të kaluar. Fryma olimpike është për t’ i dhënë mundësi të gjithëve që të shkëlqejnë. Ne i kemi dhënë mundësinë këtyre talenteve që të shkëlqejnë për flamurin kuqezi ndaj dhe vërtet jam krenar”, u shpreh ai.
Veliaj dha edhe lajmin e mirë se përveç shpërblimit nga KOKSH, tre garuesit mundës që kanë vendosur të jenë rezidentë në Shqipëri, do të marrin një apartament shpërblim nga Bashkia e Tiranës.
“Do ketë një shpërblim nga Bashkia e Tiranës. Ne do të japim një apartament për secilin nga tre garuesit mundës sepse kanë vendosur të jenë rezidentë me letra, por edhe të banojnë fizikisht në Shqipëri”, deklaroi ai.
