Shtëpia e fëmijërisë së Papa Leoni XIV, Papa i parë amerikan në histori, po del në shitje përmes një ankandi luksoz, pas një rritjeje të papritur të interesit të publikut pasi u emërua Papë më 8 Maj.
Prona ndodhet rreth 32 kilometra në jug të qendrës së Çikagos dhe përfshin tre dhoma gjumi.
Ankandi do të hapë ofertat me një çmim fillestar prej 250,000 dollarësh, ndërsa shitësi është i hapur për të pranuar një ofertë në çdo kohë para përfundimit të ankandit më 18 qershor.
Shtëpia ishte fillimisht një pronë tipike banimi dhe u listua në janar për 219,000 dollarë, pas një rinovimi të plotë nga një investitor i pasurive të paluajtshme, i cili e bleu atë për 66,000 dollarë një vit më parë.
Pavarësisht një uljeje të mëvonshme në 199,000 dollarë, shtëpia qëndroi në treg për disa muaj, por pa interes të madh.
Më 8 maj, vetëm disa orë pasi Kardinali Robert Francis Prevost, 69 vjeç, u zgjodh Papë dhe mori emrin Papa Leon XIV, shitësi hoqi menjëherë shtëpinë nga tregu, pasi brenda disa orësh kishte marrë tetë oferta.
Interesi për shtëpinë u rrit kur u zbulua se Papa i sapozgjedhur kishte kaluar dy dekada të fëmijërisë së tij në këtë shtëpi, bashkë me babain e tij Louis, një mësues, nënën Mildred, një bibliotekare, dhe dy vëllezërit e tij.
Ekspertët e pasurive të paluajtshme thonë se ankandet luksoze po bëhen gjithnjë e më të zakonshme për prona që nuk përshtaten në parametrat tradicionalë të tregut.
“Kjo është një pronë unike, me vlerë simbolike dhe historike. Ankandet luksoze janë një mënyrë për të përcaktuar vlerën reale të tregut kur kemi të bëjmë me histori të tilla të jashtëzakonshme”, u shpreh përfaqësuesi i ankandit, Haghani.
Ndërsa Vatikani përgatitet për një kapitull të ri nën udhëheqjen e Papa Leoni XIV, shtëpia ku filloi rruga e tij drejt papatit mund të bëhet jo vetëm një trofe për blerësin e ri, por edhe një copëz e rrallë e historisë amerikane në Kishën Katolike.
j.l./ dita
