Megjithëse i lirë, beteja e McGonigal me drejtësinë amerikane ndoshta do jetë e gjatë. Interesi i mediave amerikane për historinë e tij vazhdon të jetë i lartë.
Sikur mos të mjaftonin problemet e tjera është zbuluar se ai bënte jetë dyfishe. Jetonte me një të dashur, ndërkohë që ishte i martuar.
Ka qenë pikërisht kjo e dashur, e cila e raportoi në FBI, pasi kuptoi se e gënjente.
Ajo zbuloi edhe një çantë me dollarë në shtëpi, që me shumë gjasa ishin paratë që iu dhanë McGonigal nga Agron Neza.
“Një mëngjes, Allison Guerriero vuri re diçka të pazakontë, një çantë plot me para.
– “Nga dreqin erdhi kjo?” pyeti ajo.
– “Oh, të kujtohet ajo loja e bejsbollit?” u përgjigj McGonigal. “Vura një bast dhe fitova”.
Dëshmia e të dashurës është botuar nga “Businessinsider”.
“Sot, Guerriero nuk beson më që çanta me para erdhi nga një bast sportiv”, ironizon media.
Në artikullin e publikuar sot “Businessinsider” thekson se ishte deponimi i disa kolegëve të policisë së Nju Jorkut ku McGonigal kishte ndërhyrë në favor të një vajze ruse, që startoi vëzhgimin për lidhjet e tij me oligarkun e sanksionuar.
Por “aneksi shqiptar” i hetimit nisi të ndërtohej pas një emaili të së dashurës së tij, Guerriero. Ajo i dërgoi një email agjentit William Sweeney, në zyrën e FBI-së në New York City.
Sipas artikullit, ajo i tha Sweeney-t në email se ai “duhet të shikonte me çfarë po merrej McGonigal në Shqipëri si dhe lidhjet e tij jashtëmartesore”.
Prej aty, u zbulua dhe historia e 225 mijë dollarëve, duke i shtuar një akuzë të dytë, pas rusëve, ish-drejtuesit të lartë të FBI.
Krisja mes të dyve ndodhi pasi e dashura zbuloi se McGonigal ishte i martuar. “U trondita. Isha shumë e dashuruar me të dhe isha shumë e lënduar”, tha ajo.
Ajo vijon më tej duke thënë se në nëntor 2021, dy agjentë të FBI u shfaqen në derë dhe i treguan asaj një foto të McGonigal me kryeministrin shqiptar Edi Rama, ku u pyet për raportin mes tyre, por media nuk e specifikon se çfarë u tha Guerriero atyre.
o.j/dita
