Audituesi i Kontrollit të Lartë të Shtetit Bexhet Zeqiri, thirrur sot nga Komisioni Hetimor i Kuvendit, pasi ju lexua formula e betimit dhe u betua në bazë të nenit 360 të Kodit të Procedurës Penale, në shkelje të rëndë të parashikimeve të Kodit të Procedurës Penale, refuzoi më shumë se një herë të dëshmojë ndaj pyetjeve që ju bënë në komision.
Kjo është hera e parë që një dëshmitar i thirrur në Komisionin Hetimor, refuzon hapur t’i përgjigjet pyetjeve të bëra nga ana e Komisionit Hetimor, duke shënuar një precedent të rëndë dhe të rrezikshëm për autoritetin e një komisioni parlamentar dhe produktit të tij.
Ky precedent hap rrugën e mosdeklarimit ose të refuzimit për të deklaruar nga cdo dëshmitar i thirrur nga ana e komisioneve hetimore, duke dëmtuar në thelb jo vetëm reputacionin e ketij instrumenti parlamentar, por dështuar punën e komisionit në marrjen e një prove kaq të rëndësishme siç është dëshmia.
Skandali merr përmasa më të rënda, kur refuzimi për t’ju përgjigjur pyetjeve vjen nga një punonjës i shtetit shqiptar, i paguar nga taksapaguesit dhe i detyruar për të dëshmuar për veprimtarinë e tij shtetërore që duhet të realizohet në sytë e publikut dhe për publikun.
Pavarësisht paralajmërimit të Zv/Kryetarit të komisionit, Plarent Ndreca, që i kujtoi detyrimet e tij ligjore për të dëshmuar dhe dhënë shpjegime për punën e tij shtetërore para Komisionit Hetimor, përsëri nënpunësi i administratës shtetërore refuzoi përgjigjen ndaj organit më të lartë të Republikës.
Një sjellje e tillë arrogante dhe në kundërshtim të hapur me detyrimet e parashikuar nga Kodi i Procedurës Penale, jo vetëm dëshmon për nivelin shumë të ulët etik dhe disiplinor të këtij nënpunësi të KLSH, jo vetëm dëshmon kryerjen e një vepre penale nga ana e tij, por refuzimi për të dëshmuar për akte zyrtare publike, kompromenton seriozisht punën e KLSH në auditimin e realizuar ndaj Ministrisë së Shëndetësisë për kontratat objekt hetimi parlamentar dhe qëllimet e këtij auditimi.
Njëkohësisht kjo sjellje, kompromenton rëndë pozicionin e KLSH dhe drejtuesit aktual të tij (në varësi të të cilit është audituesi refuzues), në raportet me Kuvendin e Republikës së Shqipërisë, përballë të cilit ai do raportojë në muajin Qershor. Nëse një vartës i tij nuk denjon t’i përgjigjet Kuvendit, madje sillet në mënyrë arrogante dhe aspak dinjitoze për një zyrtar shteti, çfarë mund të pritet nga titullari i të njëjtit institucion.
Të gjithë titullarët e institucioneve kushtetuese kanë raportuar në Kuvend dhe u janë përgjigjur të gjithë pyetjeve të bëra nga deputetët e Kuvendit. Madje në komsionin hetimor “TIMS” i janë përgjigjur thirrjes dhe kanë dëshmuar edhe Ministri i Brendshëm i Republikës dhe Drejtori i Përgjithshëm i Policisë së Shtetit, duke mbajtur një standard që siç duket KLSH nuk e ka.
Mbetet për t’u parë se kush do jetë reagimi i Kuvendit ndaj një precedent të tillë në konsumim të hapur të një vepre penale.
