Sot shënohet 17-vjetori i vdekjes së ish-presidentit historik të Kosovës, Ibrahim Rugova. Ky i fundit ndërroi jetë më 21 janar të vitit 2006, pas një beteje me kancerin në mushkëri.
Në përvjetorin e parë të vdekjes së Ibrahim Rugovës, ish-presidenti i Kosovës, Fatmir Sejdiu, e dekoroi me Urdhrin “Hero i Kosovës”, titulli më i lartë që jepet nga Republika e Kosovës.
Kush ishte Ibrahim Rugova?
Ibrahim Rugova u lind më 2 dhjetor të vitit 1944 në Cerrcë të Komunës së Istogut. Mbaroi shkollimin e mesëm në Pejë më 1967. U diplomua në Degën e Albanologjisë të Fakultetit të Filozofisë të Universitetit të Prishtinës më 1971.
Autor i disa librave, Dr. Ibrahim Rugova ishte fillimisht redaktor në gazetën e studentëve “Bota e re” dhe në revistën shkencore “Dituria” (1971-72), që botoheshin në Prishtinë. Pastaj për afro dy dekada, Dr. Rugova punoi në Institutin Albanologjik të Prishtinës si hulumtues i letërsisë. Për një kohë ka qenë kryeredaktor i revistës “Gjurmime albanologjike”, që e nxirrte ky Institut.
Është zgjedhur kryetar i Shoqatës së Shkrimtarëve të Kosovës më 1988, e cila u bë bërthamë e fuqishme e lëvizjes që kundërshtonte sundimin serb/jugosllav në Kosovë.
Më 23 dhjetor 1989 u zgjodh kryetar i Lidhjes Demokratike të Kosovës (LDK).
