Prokuroria e Posaçme ka marrë të pandehur zyrtarisht kryebashkiakun e Tiranës, Erion Veliaj. Bëhet me dije se akuzat Veliajt do t’i komunikohen ditën e sotme ndërsa avokatët e tij janë njoftuar zyrtarisht nga Prokuroria e Posaçme.
Ekipi ligjor i kryebashkiakut të Tiranës, Erion Veliajt ka reaguar dje pas raportimeve se SPAK do ta marrë zyrtarisht të pandehur dhe se nesër do t’i komunikohen akuzat. Në nisje të reagimit avokatët shprehën shqetësimin që lajmi për marrjen e Veliajt si të pandehur nga SPAK ka arritur më parë te mediat sesa te kryebashkiaku.
Ndërkohë më tej thuhet se njoftimi i akuzës dhe përfundimi i hetimit nga SPAK i jep mundësinë Veliajt që të shqyrtojë siç duhet akuzat që janë ngritur ndaj tij dhe të analizojë provat e prokurorisë. Gjithashtu thuhet se Veliaj kundërshton me forcë çdo akuzë për shkelje dhe thekson se ndalimi sipas tyre, i zgjatur dhe i paarsyeshëm është në dëm jo vetëm të tij por dhe të qytetarëve të Tiranës.
Veliaj u arrestua në zyrën e Bashkisë më 10 shkurt si i dyshuar për kryerjen e veprës penale të “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim (9 herë), “Pastrimi i produkteve të veprës penale ose veprimtarisë kriminale” dhe “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”. Bashkëshortja e kryebashkiakut, Ajola Xoxa është lënë në masë sigurimi “detyrim paraqitje”.
Sipas SPAK nga të dhënat konkrete të mbledhura deri në këtë fazë të hetimit paraprak, në mënyrë të përmbledhur rezulton se, nga personat nën hetim, specifikisht Veliaj edhe bashkëshortja e tij është ideuar, krijuar dhe vënë në funksionim një mekanizëm që ka synuar dhe ka bërë të mundur, në praktikë, marrjen e përfitimeve të parregullta, të cilat burojnë nga fondet publike që administrohen nga Bashkia Tiranë, përmes titullarit të saj, me qëllim pasurimin personal të këtij të fundit dhe familjes së tij, përmes veprimeve të kamufluara dhe të kundërligjshme.
j.l./ dita
