Studentja 22-vjeçare nga Tropoja, u përplas fatkeqësisht për vdekje nga një makinë tre ditë më parë në Durrës, shoferi i të cilës u ndalua. Një detaj rrënqethës ishte edhe fakti se Erisa Aliaj jo vetëm studionte fortë dhe ishte e shkëlqyer në mësime, por edhe i duhej të punonte për të siguruar të ardhura.
Nga Tropoja, Erisa Aliaj përveç studimeve ishte edhe e punësuar, kurse në momentin kur u përplas nga makina, po kthehej nga puna, në një fasoneri. Për ngjarjen e rëndë ka shkruar edhe Eva Allushi, njëra prej pegadogeve të së resë, e cila shpreh dhimbjen dhe revoltën për ndarjen e parakohshme nga jeta të studentes së saj.
Postimi i plotë nga pedagogia e Universitetit të Durrësit:
“Erisa, po pse ike kaq shpejt moj zemër?! Po ti ishe si dritë. Ndriçoje në grup e në fakultet. Nuk e dije ti që jeta në këtë vend nuk vlen fare?! Nuk ta kishim thënë as ne, pedagogët e tu. Po ti nuk kishe kohë të merreshe me këto.
Ti i kishe dalë jetës tënde për zot. Studioje e punoje, o shpirt. E kishe zgjedhur dhe temën e diplomës për të drejtat e fëmijëve, përballe abuzimit të medias.
Do të kishe qenë një profesioniste e zonja shumë. Po nuk të lanë. Nuk zgjodhe të ikje. Ta morën jetën teksa ktheheshe nga puna moj zemër! Na trondite shumë të gjithëve ne, profesorëve e shokëve të tu.
Nuk desha ta lexoja atë lajm që bënte fjalë për një 22-vjeçare në Durrës, po zemra e ndjeu teksa mendova për studentët e mi. Nuk e mbylle dot as diplomën, e as masterin. Pate jetë të shkurtër, por plot dinjitet. Të prehesh në paqe! Ndriçofsh si yll nga lart, për familjen tënde, miqtë dhe shokët!”
